Scaoil na póilíní i mBeirlín Abdul B. chun báis agus é ar a theitheadh tar éis ionsaí ar chóisir Bród sa chathair sin le mionbhus agus maiseite, ionsaí inar dúnmharaíodh bean amháin agus inar leonadh 29 duine eile.
Nuair a léigh mé go raibh na póilíní tar éis Abdul B. a scaoileadh chun báis nuair a d’ionsaigh sé iad le linn iarracht é a ghabháil, níor éirigh liom aon trua a mhothú dó.
Mhothaigh mé ina ionad sin fuath, agus ní do Abdul B. amháin ach don dream as ar eascair sé. Rud a bhain siar asam, go mór, toisc gur mothúchán gránna míshláintiúil atá san fhuath. Ní chothaíonn an fuath ach fuath, agus níl mé ag iarraidh a bheith ar dhuine de na daoine sin a bhfuil an ghráin acu ar phobal iomlán, díreach toisc go bhfuil daoine i measc an phobail sin atá go hiomlán as a meabhair.
Mo chroí agus mo choinsias idir mé agus an eite fhíordheis.
Ach ní thagann an fuath – agus fuath a bhíonn taobh thiar de chuile ionsaí ar an bpobal LADT+ – ní thagann an fuath chun cinn i bhfolús. Cá raibh tuistí Abdul D.? Deartháireacha, deirfiúracha, uncaileacha, aintíní, col ceathracha, cairde, comharsana?
Tá ceisteanna á gcur faoi láthair sa Ghearmáin maidir leis an gcaoi ar lig na húdaráis do Abdul B., a ciontaíodh i mí na Bealtaine as coir fhoréigneach, an príosún a sheachaint ar an gcoinníoll go nglacfadh sé páirt i gcúrsa díradacaithe.
Is ceart agus is cóir go bhfuil na ceisteanna sin á gcur, ach bímis ionraic faoi: ní ar údaráis na Gearmáine an locht go ndearnadh radacach de Abdul B. an chéad lá riamh, ná gur lasadh ina aigne fuath do dhaoine a thugann grá do dhaoine dá n-inscne féin, do dhaoine a thugann dúshlán na n-inscní seanbhunaithe, agus mar sin de.
Gan dabht, ní raibh an t-ionsaí i mBeirlín ag an deireadh seachtaine ar an gcéad ionsaí a rinne sceimhlitheoirí Ioslamaíocha ar an bpobal LADT+. An homafóibe agus an t-antoisceachas Moslamach a bhí taobh thiar d’ionsaí a tharla le linn fhéile Bród in Osló na hIorua i mí an Mheithimh 2022; dúnmharaíodh beirt agus leonadh 21. An t-ionsaí ba thromchúisí den chineál sin ná an ceann a tharla sa chlub Pulse in Orlando na Stát Aontaithe i mí an Mheithimh 2016, ionsaí inar dúnmharaíodh 49, inar leonadh 58, agus inar maraíodh an t-ionsaitheoir féin freisin.
Níl mé chomh gearrbhreathnaitheach sin go gceapaim go bhfuil an homafóibe teoranta don Ioslam amháin, ná go deimhin gur Ioslamaíoch atá i ngach uile Ioslamach (duine a cheapann gur chóir go mbeadh an Ioslam mar bhunús le struchtúr an stáit agus na sochaí atá sa duine leis an í breise.)
Nílim ag iarraidh ach oiread a bheith ar m’airdeall chuile uair a fheicim mionbhus á thiomáint ag fear Arabach. Ach an mbíonn an t-ionsaí a tharla i mBeirlín ag an deireadh seachtaine agus eachtraí Osló agus Orlando ar chúl m’aigne?
Bíonn.
In aghaidh mo thola agus i m’ainneoin féin.
Go háirithe agus an fhéile WorldPride ar siúl faoi láthair san Ísiltír, mar a bhfuil cónaí orm.
Deir lucht eagraithe fhéile Bród Bheirlín i ráiteas: ‘Aithnímid sceimhlitheoireacht Ioslamaíoch gan aon agó. Ag an am céanna táimid go daingean i gcoinne gach iarracht teacht i dtír ar an eachtra seo chun fuath a ghríosú i gcoinne Moslamach nó i gcoinne daoine de shliocht áirithe.’
Tá sé sin an-lách agus an-tuisceanach go deo ach chomh maith leis sin, céard eile a d’fhéadfaidís a rá? Dá dtiocfadh an eite fhíordheis i dtír ar an eachtra seo (tá an páirtí nua-fhaisisteach AfD ar an dara páirtí is mó sa Ghearmáin) ní dea-thuar a bheadh ansin do chearta an phobail LADT+ ach oiread, ná go deimhin don daonlathas.
Tá an pobal LADT+ ag seasamh gualainn ar ghualainn leis an bpobal Moslamach mar sin, ina gcuid ráiteas oifigiúil ar chaoi ar bith. Ach an bhfuil an pobal Moslamach gualainn ar ghualainn leis an bpobal LADT+? An bhfuil tuistí, deartháireacha, deirfiúracha, uncaileacha, aintíní, col ceathracha, cairde agus comharsana ag cinntiú nach dtarlóidh eachtraí mar a tharla i mBeirlín an deireadh seachtaine seo caite go deo arís?
Cathal
B’uafásach ar fad an eachtra choiriúil a tharla i mBeirlín ar an deireadh seachtaine seo caite, gan amhras ar bith.
“Ach an bhfuil an pobal Moslamach gualainn ar ghualainn…”
Tuigim an méid atá á rá ag údar an ailt ach ba chóir a bheith cúramach. Is minic a chuala mé Moslamaigh ag rá an méid seo a leanas, “nuair a dhéanann Moslamach eachtra uafásach, leagtar an fhreagracht ar an bpobal Moslamach trí chéile agus bítear ag súil le freagairt dá réir uaidh, ach nuair a dhéanann ‘Críostaí’ (glantéacs: duine geal) rud dá leithéid is duine aonair a rinne é agus ní éalaítear freagairt sa dóigh chéanna ón ‘bpobal Críostaí’ (glantéacs: pobal geal).”
Tá taighde eolaíochta déanta ag an lucht acadúil ar an bhfeiniméan a dtugtar imní dhéimeagrafach air agus ar na torthaí a bhíonn air, feiniméan a ndeirtear faoi go mbaineann sé sa chéad áit leis na pobail bhundúchasacha gheala i dtíortha i dtuaisceart na hEorpa. Is cuid suntais í gur sna tíortha a raibh cáil na forásachta orthu cheana féin sna 1970í a shonraigh an feiniméan seo ar dtús. In áiteanna tugtar “tuirse ilchultúrtha” air. Thairis sin is díol spéise é nach raibh an ciníochas lom inghlactha níos mó sa dioscúrsa poiblí ag an am agus gur tosaíodh dá bharr ar “chleasa” eile a úsáid. Der réir na taighde déantar – in áit an chiníochais loim – arm as cearta ban agus cearta LADT+ etc. chun na spriocanna céanna i gcoinne imirceach a bhfuiltear ag díriú orthu a bhaint amach.
Is léir gur bior sa bheo ag cuid shuntasach den bhunaíocht i dtíortha éagsúla go léiríonn cuid mhaith den phobal LADT+ dlúthpháirtíocht “nach n-oireann” – agus is léir freisin go mbíonn daoine áirithe ar a ndícheall an pobal LADT+ a scaradh ón dlúthpháirtíocht seo. Is seanscéal an méid seo faoi seo agus tá an pobal LADT+ – nó cuid mhaith díobh – ar an airdeall le fada.
Baineann an méid thuas sa chéad áit le tíortha i dtuaisceart na Mór-Roinne atá ar tosach san phróiseas seo agus beidh sé suimiúil conas mar a bheidh an scéal in Éirinn amach anseo. An dtiocfaidh an “tuirse ilchultúrtha” chéanna ar an bpobal?