Ateangaireacht bheo Ghaeilge le déanamh den chéad uair ar aitheasc ‘Staid an Aontais’ i bParlaimint na hEorpa

Déanfar ateangaireacht bheo go Gaeilge ar an aitheasc ‘Staid an Aontais’ Choimisiún an Aontais Eorpaigh den chéad uair riamh amárach. Is í Uachtarán Choimisiún na hEorpa, Ursula von der Leyen, a thabharfaidh an t-aitheasc do Pharlaimint na hEorpa agus í ag leagan amach tosaíochtaí an Aontais Eorpaigh don bhliain atá romhainn.

Is é seo an chéad uair i stair an Aontais Eorpaigh go mbeidh an pobal in ann éisteacht le haitheasc Staid an Aontais i nGaeilge agus an óráid á tabhairt beo. Ní bheidh le déanamh ach an Ghaeilge a roghnú ó liosta na dteangacha i roghchlár an fhíseáin bheo a bheidh á chraoladh ag 8am amárach.

Agus an óráid á tabhairt blianta eile roimhe seo, bhí téacs na cainte ar fáil i nGaeilge ach ní raibh an tseirbhís ateangaireachta beo ann. Beidh ateangaire ann inniu le Gaeilge a chur ar chaint an Uachtaráin von der Leyen.

Deir Coimisiún na hEorpa go n-úsáidfidh von der Leyen an óráid i mbliana le clár oibre a leagan amach don Aontas Eorpach “chun freagairt do riachtanais mhuintir na hEorpa le tionscnaimh nithiúla”.

“Is tráth é seo freisin chun ómós a thabhairt do mhuintir na hEorpa, laochra laethúla: mar shampla, na lúthchleasaithe parailimpeacha a bhain amach an méid a dhealraigh a bheith dodhéanta, na hoibrithe daonnúla a sheachadann cabhair ar an túslíne,” a deirtear ar shuíomh an Choimisiúin.

Meastar go leagfaidh von der Leyen an-bhéim ina haitheasc ar “neamhspleáchas na hEorpa” a bhaint amach agus an chuing eacnamaíochta agus teicneolaíochta, atá ag na Stáit Aontaithe, an Rúis, agus tíortha eile taobh amuigh den Aontas ar thíortha an Aontais, a bhriseadh.

“Le bliain anuas, is ar chumas na hEorpa gníomhú i ndomhan atá ag athrú a neartú a bhí ár gcuid iarrachtaí dírithe. D’oibrigh an Coimisiún Eorpach chun borradh a chur faoin iomaíochas, spleáchais straitéiseacha a laghdú, an chosaint a neartú, tacú leis an Úcráin, comhpháirtíochtaí domhanda a leathnú, agus an daonlathas agus saoránaigh a chosaint.

“Is é is aidhm do na hiarrachtaí sin Eoraip níos neamhspleáiche, níos sláine agus níos rathúla a fhorbairt. Táimid ag léiriú go bhfreagraíonn an Eoraip le chéile nuair a thugtar ár ndúshlán,” a deirtear ar shuíomh an Choimisiúin.

Beidh an tUachtarán von der Leyen ag labhairt os comhair Pharlaimint na hEorpa in Strasbourg ag 8am maidin amárach. Craolfar an t-aitheasc beo ar shuíomh an Choimisiúin agus beidh taifead agus téacs na hóráide ar fáil ar an suíomh ina dhiaidh sin.