GRADAM: Helen Ní Shé le hinsealbhú i Halla na Laochra Raidió IMRO

Tá Helen Ní Shé, óstach an phodchraolta Paiste Cainte ar Tuairisc agus iarchraoltóir le RTÉ Raidió na Gaeltachta, le hinsealbhú i Halla na Laochra Raidió IMRO ag tús na míosa seo chugainn.

Mar láithreoir ar An Saol Ó Dheas ar RTÉ Raidió na Gaeltachta is fearr atá aithne ar Helen Ní Shé, atá áirithe i measc shárchraoltóirí agus agallóirí na tíre.

Bhí an clár irise ó chúige Mumhan á chur i láthair aici ón mbliain 2007, nuair a tháinig sí i gcomharbacht ar Mhicheál Ó Sé tar éis di filleadh ar an raidió i ndiaidh seal a chaitheamh ina cónaí i Nua-Eabhrac.

I 1986 a thosaigh Helen Ní Shé, ó Chathair Scoilbín i bParóiste na Cille, ag obair le Raidió na Gaeltachta sa seomra nuachta i mBaile na nGall. Thug sí tréimhsí ina léiritheoir ar An Saol Ó Dheas agus bhí sí ina léiritheoir ar Iomarbhá Feasa, sraith tráth na gceist idir paróistí na Mumhan agus ina láithreoir ar Gaoth an Fhocail clár tráth na gceist eile, a mbíodh scoth na gcainteoirí Gaeltachta páirteach ann.

Le linn na tréimhse 17 bliain a chaith sí ina láithreoir ar An Saol Ó Dheas, bhain sí cáil amach mar láithreoir tuisceanach géarchúiseach, buanna a léirigh sí go paiteanta in agallamh coscrach a rinne sí in 2018 le Emma Mhic Mhathúna, duine de na mná a bhí thíos leis an gconspóid CervicalCheck.

Tá meas uirthi chomh maith as an tuiscint a léirigh sí ar a pobal féin agus pobal na Mumhan trí chéile agus tá cuid de na cláir ina ndeachaigh An Saol Ó Dheas i measc an phobail i measc na gcláracha is mó a thuill aitheantas di. Tugadh ardmholadh don tsraith clár faoin aer a chuir sí i láthair le linn dianghlasáil bhlianta na paindéime Covid-19.

Tá aitheantas faighte cheana ag Helen i dtionscal na craoltóireachta. Bronnadh gradam Craoltóir na Bliana an Oireachtais uirthi in 2014 agus 2018, agus bronnadh Gradam Craoltóir Solabhartha na Bliana uirthi in 2020.

Beidh searmanas speisialta ann díreach roimh bhronnadh Ghradaim Raidió IMRO le Helen Ní Shé agus triúr craoltóirí eile a insealbhú i Halla na Laochra ar an 2 Deireadh Fómhair. Beidh an searmanas agus na gradaim ar siúl in Óstán Eastát Ráth an Lígh i gCill Chainnigh.

Is iad an triúr craoltóirí eile a bheidh á n-insealbhú ná Michael Crawley, ó LMFM; Teena Gates, a d’oibrigh ar RTÉ, 98FM, Today FM, agus Newstalk i measc stáisiúin eile; agus Marty Whelan, ó RTÉ Lyric FM.

Rinne Rónán Ó Domhnaill, coimisinéir forbartha meán le Coimisiún na Meán, comhghairdeachas leis an gceathrar craoltóirí agus dúirt go bhfuil an t-aitheantas tuillte go maith acu mar gheall ar a “dtiomantas agus scil mar chraoltóirí”.

“Is iontach an rud a fheiceáil go bhfuil aitheantas á thabhairt don mhéid atá tugtha acu do chúrsaí raidió in Éirinn. Is cuid lárnach de na meáin chumarsáide in Éirinn é an raidió. Cuireann sé éagsúlacht guthanna agus dearcthaí ar fáil a thugann idir eolas agus siamsaíocht d’éisteoirí ar fud na tíre,” a dúirt Ó Domhnaill.