Tá cead tugtha ag an dá roinn a chuireann maoiniú ar fáil d’Fhoras na Gaeilge a gceannáras a aistriú ó Chearnóg Mhuirfean go Sráid Amiens i dtuaisceart Bhaile Átha Cliath.
Thug an tAire Stáit Gaeltachta Seán Kyne le fios sa Dáil an tseachtain seo go bhfuil cead ‘foirmeálta’ faighte ag an eagraíocht trasteorainn ó Roinn na Gaeltachta agus an Roinn Pobal aistriú go Sráid Amiens.
Thug Príomhfheidhmeannach Fhoras na Gaeilge, Seán Ó Coinn, le fios do Tuairisc.ie aréir, áfach, nach bhfuil an léas ar an bhfoirgneamh ar Shráid Amiens sínithe fós agus nach síneofar é go dtí go mbeidh an fhoireann le haistriú ann.
Dúirt Ó Coinn go bhfuil obair athchóirithe le déanamh ar an bhfoirgneamh sula mbogfaidh an fhoireann ó Chearnóg Mhuirfean go Sráid Amiens, agus go síneofar an léas nuair a bheidh an obair sin curtha i gcrích agus an fhoireann réidh le haistriú.
Dúirt an tAire Stáit Gaeltachta go bhfuil glactha ag an dá roinn a chuireann maoiniú ar fáil don eagraíocht leis an “cás gnó cuimsitheach” a cuireadh faoina mbráid maidir le haistriú ó Chearnóg Mhuirfean.
“I gcomhréir le halt 5 dá Mheamram Airgeadais, chuir Foras na Gaeilge cás gnó cuimsitheach i leith léas ar cheannáras nua faoi bhráid na Ranna Urraíochta sa dá dlínse anuraidh. Is féidir liom a dheimhniú go bhfuil cead foirmeálta tugtha don chás gnó sin anois,” a dúirt an tAire Kyne.
Is ag 63-66 Sráid Amiens a bheidh ceannáras nua an Fhorais.
Tuairiscíodh i mí Feabhra go raibh aighneas idir foireann agus lucht bainistíochta Fhoras na Gaeilge maidir leis an gcinneadh go mbogfaí ceannáras na heagraíochta teanga ó Chearnóg Mhuirfean chuig Sráid Amiens i dtuaisceart na cathrach.
Tá séanta ag Cathaoirleach Bhord Fhoras na Gaeilge, Pól Ó Gallchóir, go bhfuil aon bhunús le líomhaintí a rinne ball foirne faoin bpróiseas aistrithe oifige, líomhaintí a rinne an ball foirne faoi scáth na reachtaíochta a tugadh isteach mar chosaint do sceithirí.
Fág freagra ar 'Cead faighte ag Foras na Gaeilge aistriú go Sráid Amiens ach gan aon léas sínithe fós'