Neart, misneach agus fuarchúis intinne riachtanach don chath mór in Inis

Nárbh iontach an rud é gur socraíodh an dá chluiche i gcraobh na Mumhan an Domhnach seo caite san imirt deireanach sa gcluiche le poc saor fada sa nóiméad deireanach i gcás amháin, agus le liathróid fhada isteach sa chás eile?

I gcás Chorcaí, chosain siad poc saor fada Darragh O’Donovan, tráth a dtabharfadh cúl an bua do Luimneach.

Naoi n-imreoir is fiche a bhí laistigh de líne 65 Chorcaí, agus Nickie Quaid, cúl báire Luimnigh, an t-aon duine nach raibh.

Slua 43,369 ag faire, an clog ag taispeáint 77 nóiméad, agus Corcaigh chun cinn le dhá phointe. Scaoil O’Donovan an liathróid anuas i dtreo an chúil ach sheas Corcaigh an fód agus glanadh an liathróid amach.

Agus i gcás Phort Láirge, theip ar Thiobraid Árann liathróid fhada ón gcúl báire Billy Nolan a chosaint, liathróid a chríochnaigh le cúl deireanach fíordhrámatúil ó Kevin O’Mahony, agus comhscór ag Phort Láirge.

Toradh é a bhí tuillte ag na Déise agus ní mar gheall ar a gcruinneas, a bhí go dona ar fad, mar scóráil siad 27 uair ach chaill siad 23 seans, 16 cinn acu ina gcúilíní. Ach bhí an toradh tuillte acu mar gheall ar an dúshlán agus an diúltú géilleadh a léirigh siad nuair ba chosúil ag leath ama go raibh an cluiche agus a ndeis fanacht sa chraobh imithe uathu.

I gCúige Laighean, bhí trí chluiche againn. Oíche Shathairn, chuaigh Cill Chainnigh i mbun oibre i gceart agus chuir siad pointí tábhachtacha ar an gclár. Bhí Loch Garman bocht, ach ba é díocas chun oibre Chill Chainnigh a rinne an difríocht sa dara leath agus a mhaolaigh an teannas a bhí ann roimh an gcluiche i bPáirc UPMC Nowlan.

Bhí seachtain chrua ag Cill Chainnigh roimh ré tar éis dóibh a bheith buailte ag Gaillimh le 33 pointe san iomlán, idir chluichí na Sraithe agus na craoibhe. Ach oíche Dé Sathairn, léirigh siad cuid dá seanráta oibre arís, chomh maith lena gcumas cúil a fháil. Fuair Martin Keoghan dhá cheann acu agus ar ndoígh sháraigh TJ Reid an churiarracht scórála i gcraobh na hÉireann.

Bhí a líne leathchúil thar barr ar fad freisin. Mar sin, seachtain mhaith a bhí inti do Chill Chainnigh agus Uíbh Fhailí rompu anois.

I gceann de chluichí an Domhnaigh, rinne Gaillimh gach a raibh le déanamh acu chun tús foirfe a chur leis an gcraobh, cé gur scaoil siad 19 gcinn ar fóraoil.

Bhí Uíbh Fhailí, agus iad tagtha isteach sa chluiche seo tar éis comhscór in aghaidh Bhaile Átha Cliath, maith go leor arís. Ach bhí siad i dtrioblóid nuair a bhí siad trí phointe chun deiridh ag leath ama, in ainneoin gurbh acu a bhí cóir na gaoithe sa chéad leath.

Bhí Gaillimh i bhfad níos láidre sa dara tréimhse. Ghlac siad smacht ar an gcluiche de réir a chéile, choinnigh siad an clár scórála ag athrú, agus sa deireadh bhí bua compordach 11 phointe acu.

Bhailigh Áth Cliath péire pointí eile i gcoinne Chill Dara le cur leis an gceann a bhí acu ón gcomhscór i gcoinne Uíbh Fhailí

An deireadh seachtaine seo níl ach cluiche amháin ar siúl ach cad é mar dhís a bheidh ag tabhairt aghaidh ar a chéile.

Tá an stair nua-aimseartha chomh láidir sin idir Luimneach agus an Clár gur geall le caibidil eile den scéal céanna a bheidh á cur léi amárach. Is léir, i mo thuairimse, nach bhfuil aon eagla ar an gClár roimh Luimneach, agus ní dóigh liom go mbeidh aon athrú air sin Dé Domhnaigh.

Is minic gurb é cumas an Chláir cur isteach ar rithim Luimnigh ceann de phríomhthréithe na gcluichí sin. Nuair a fhaigheann Luimneach seilbh ghlan, ón gcéad bhuille, bíonn siad in ann luas agus cruth an chluiche a stiúradh. Ach má éiríonn leis an gClár cluiche tapaidh, garbh agus míshlachtmhar a dhéanamh de, is áit an-deacair é Inis le bheith ar cuairt ann.

Tá Cian Lynch agus Aaron Gillane fós as láthair agus is caillteanas ollmhór do Luimneach. Fágann sin cúinsí i bhfad níos cothroime, déarfainn. B’fhéidir gur lú de chluiche traidisiúnta a bheidh anseo agus gur mó de chath síceolaíochta a bheidh i gceist. Beidh sé thar a bheith suimiúil freisin na himreoirí a bheidh ag marcáil a chéile a fheiceáil nuair a thosóidh an cluiche. Tá seacht gcúl ligthe isteach ag an gClár ina dhá chluiche dheireanacha, rud a chaithfidh a bheith ina chúis imní dóibh. Ach ar an taobh eile den scéal, cuireann ábaltacht Tony Kelly, Shane O’Donnell, Peter Duggan agus Mark Rogers cuma an-chontúirteach ar a líne ionsaithe.

Ach tá painéal an-láidir fós ag Luimneach, agus taithí mhór ar chathanna mar seo acu. Ba cheart, mar sin, go mbeadh fíorchath romhainn in Inis, cluiche ina mbeidh neart, misneach agus fuarchúis intinne chomh tábhachtach céanna le haon phlean imeartha.

Dhá scéal thairis.

1. Comhghairdeas le TJ Reid as a bheith ar an phríomhscórálaí sa chraobh, riamh anall. Tá sé anois leis féin ar bharr an liosta (41-657) tar éis dó curiarracht Patrick Horgan (32-683) a shárú. Agus ós rud é go bhfuil Horgan éirithe as anois, is léir go méadóidh TJ a bhuntáiste sna seachtainí atá romhainn.
2. Is cosúil go mb’fhéidir go bhfuil bunús éigin le trioblóidí Aontroma ar an bpáirc lasmuigh den pháirc féin. Léiríonn na ráitis éagsúla a eisíodh le cúpla lá anuas nach bhfuil cúrsaí i gceart, ar an bpáirc ná lasmuigh di. Tá sé deacair go leor cheana féin ar na foirne ó thuaidh fanacht iomaíoch ag an leibhéal seo gan fadhbanna seachtracha a bheith ag cur leis an ualach. Tá súil agam, mar sin, go réiteofar an scéal ar bhealach a shásóidh na himreoirí.