‘Masla breise é nár éirigh leis an HSE m’ainm a litriú i gceart’

I mBéarla atá an HSE i mbun cumarsáide i gcónaí le hiar-uachtarán de chuid Chonradh na Gaeilge a d’inis a scéal an tseachtain seo faoi na deacrachtaí a bhí aici clárú i nGaeilge do vacsaín Covid-19.

In ainneoin an dua a chaith sí ag iarraidh clárú i nGaeilge don vacsáin, i mBéarla amháin a bhí an t-uasdátú a fuair Íte Ní Chionnaith ón HSE inniu.

Chomh maith leis sin, litríodh a hainm mícheart sa teachtaireacht ghutháin a fuair sí ag insint di go mbeidh coinne vacsaíne amárach aici.

‘iteni chionnaith’ a tugadh ar Íte Ní Chionnaith sa teachtaireacht ó Fheidhmeannacht na Seirbhíse Sláinte.

Ag labhairt dó le Tuairisc.ie dúirt sí go raibh an easpa seirbhíse i nGaeilge ón HSE “uafásach míshásúil” agus gur “masla breise” a bhí ann nár éirigh leo a hainm a litriú i gceart.

B’amhlaidh, a dúirt sí, go bhfuil an phaindéim agus an ghéarchéim sláinte “á n-úsáid mar leithscéal ag Feidhmeannacht na Seirbhíse Sláinte gan seirbhís a chur ar fáil don phobal i nGaeilge ina dteanga féin”.

“Ar ndóigh dá mbeadh an struchtúr ceart ón gcéad lá, ní tharlódh a leithéid mar bheadh seirbhís i nGaeilge ar fáil go nádúrtha i gcásanna mar seo, ach níl an struchtúr sin san HSE agus is léir nach suim leo seirbhís a chur ar fáil i nGaeilge don phobal,” arsa Íte Ní Chionnaith.

Níl aon rogha eile ag duine atá ag iarraidh clárú i nGaeilge do vacsaín in aghaidh an Covid-19 ach dul i muinín an ghutháin mar nach féidir clárú i nGaeilge ar líne.

Tá Feidhmeannacht na Seirbhíse Sláinte á fiosrú ag an gCoimisinéir Teanga mar gheall ar an teip sin.

Mhaígh an HSE inné go raibh siad le rogha na Gaeilge a chur ar roghchlár réamhthaifeadta a líne chabhrach do dhaoine atá ag iarraidh clárú do vacsaín.

Dúirt an HSE an tseachtain seo caite nárbh fhéidir leo deis a thabhairt do dhaoine clárú do vacsaín i nGaeilge ar líne toisc gurb é a bpríomhaidhm ná beatha daoine a shábháil.

Maíonn siad áfach gur féidir le duine clárú i nGaeilge ar an líne chabhrach.