‘Ní bheidh an Roinn ag soláthar Scéim Líofa in 2017. Nollaig mhaith agus bliain úr faoi mhaise daoibh…’

Cáineadh láidir déanta ar chinneadh na Roinne Pobal ó thuaidh deireadh a chur leis an scéim sparánachta Líofa

‘Ní bheidh an Roinn ag soláthar Scéim Líofa in 2017. Nollaig mhaith agus bliain úr faoi mhaise daoibh…’

Tá cáineadh láidir déanta ar chinneadh na Roinne Pobal ó thuaidh deireadh a chur leis an scéim sparánachta Líofa, scéim a thug deis do 100 duine freastal ar ranganna Gaeilge samhraidh i nGaeltacht Dhún na nGall.

Ba i ríomhphost a seoladh tráthnóna ó oifig Líofa a chuir an Roinn Pobal an cinneadh in iúl do lucht na gcoláistí Gaeltachta a chuir na ranganna ar fáil faoin scéim.

“Mar gheall ar choigilteas éifeachtúlachta ní bheidh an Roinn ag soláthar Scéim Sparánachtaí Líofa i 2017. Nollaig mhaith agus bliain úr faoi mhaise daoibh,” a dúradh sa ríomhphost.

Dúirt Niall Comer ó Chonradh na Gaeilge gur “ionsaí soiniciúil” ar an nGaeilge a bhí sa chinneadh agus go raibh “leithcheal soiléir” i gceist.

Dúirt sé go mbeadh na céadta gasúr atá faoi mhíbhuntáiste thíos le cinneadh an Aire Pobal Paul Givan (DUP) deireadh a chur leis an scéim.

Fág freagra ar '‘Ní bheidh an Roinn ag soláthar Scéim Líofa in 2017. Nollaig mhaith agus bliain úr faoi mhaise daoibh…’'

  • Seán Mag Leannáin

    Is díol spéise é gurb é an tAire céanna Paul Givan (DUP), a deir go bhfuil sé go mór ar son athfhorbairt a dhéanamh ar Pháirc Mhic Easmuinn i mBéal Feirste , a rinne an cinneadh slíomach sprionlaithe seo agus, chun an tarcaisne a chur i mullach na héagóra, a sheol an teachtaireacht maslach seo ag aimsir na Nollag. “Mar gheall ar choigilteas éifeachtúlachta ní bheidh an Roinn ag soláthar Scéim Sparánachtaí Líofa i 2017. Nollaig mhaith agus bliain úr faoi mhaise daoibh.” Is léir go bhfuil Givan ar son athfhorbairt a dhéanamh ar Pháirc Mhic Easmuinn mar thacaíocht don iarracht cluichí móra rugbaí de chuid chorn an domhain a thabhairt go Béal Feirste agus ní ar son an athmhuintearais nó an chomhionnanais. Spreagtar an cheist cén fáth go gcuirfeadh cúpla céad páiste ón Tuaisceart ag iarraidh an Ghaeilge a fhoghlaim mar chuid dá bhféiniúlacht chultúrtha an oiread sin oilc agus alltachta air? Aghaidh nua na hóige san DUP deirtear, ach an seanphort biogóideach i gcónaí, tá brón orm a rá.

  • Liam Mac Lochlainn

    Teachtaireacht an-mhaslach atá ann, gan amhras. Tá an tAire ag iarraidh airgead a choigilt. Cuireann sin iontas orm. De réir cosúlachta, tá talladh airgid ag Stormont. Beidh Rialtas an Tuaiscirt ag íoc níos mó ná £490 milliún sa bhreis sa scéim RHI. Agus bíonn an figiúr ag éirí an t-am ar fad, mar aon leis an toit. (Ba chóir ‘ Beidh Pobal Thuaisceart Éireann ag íoc’ a rá, ar ndóigh.) Aimsir na Nollag atá ann agus tá Scrooge beo beathach i Stormont. Agus níl an bhiogóideacht marbh ach oiread. Nollaig mhaith duitse, a Aire. Agus codladh sámh.

  • Liam Mac Lochlainn

    Tá brón orm -botún cló: ‘talladh’ in áit ‘dalladh’. ‘Talladh’ : sin ‘lifting,taking, stealing,cutting, lopping, spoiling’ ( Dinneen). Nuair a smaoiníonn tú air, sin focal maith fosta….