Leabhar faoin nGaeilge a bhí ag barr an liosta sárdhíola in Éirinn an tseachtain seo. Bhain an leabhar Gaeilge i Mo Chroí |Irish in My Heart: Your Guide to Loving and Living the Irish Language le Molly Nic Céile barr an liosta sárdhíola amach sa rannóg ‘Neamhfhicsean faoi Chlúdach Crua’.
Díoladh 587 cóip den leabhar a d’fhoilsigh Hachette Books Ireland Group, sa tseachtain dar críoch 14 Meán Fómhair, 2024.
Ba é an 13ú leabhar is fearr díol an tseachtain sin idir na liostaí sárdhíola ar fad, idir ficsean agus neamhfhicsin.
Is é Gaeilge i Mo Chroí | Irish in My Heart: Your Guide to Loving and Living the Irish Language an chéad leabhar le Molly Nic Céile a chur tús lena turas teanga le cainéal YouTube. Chuir sí tús leis an gcainéal YouTube ‘Gaeilge i mo Chroí’ ceithre bliana ó shin.
“Bhí mé ag iarraidh an Ghaeilge a bhí agam a roinnt le daoine agus bhí suim agam i YouTube agus sa Ghaeilge. Thosaigh mé beagnach cúig bliana ó shin agus ansin tharla an phaindéim agus thosaigh níos mó daoine ag foghlaim na Gaeilge agus á h-athfhoghlaim. Thosaigh an cainéal ag fás agus tháinig go leor daoine ar cuairt ar na físeáin agus thug sé sin spreagadh dom.”
Tá 43,500 leantóir ag an gcainéal YouTube ‘Gaeilge i Mo Chroí’ anois. Chuir Nic Céile tús le leathanach Instagram freisin. Cuireann sí amach leaganacha gearra d’fhíseáin ar @Gaeilge_I_Mo_Chroi, áit a bhfuil 35,000 leantóir aici.
Cúpla bliain ó shin a thosaigh sí ag cuimhneamh ar leabhar a scríobh. Thug leagan amach an leabhair deis di an teachtaireacht atá aici faoin nGaeilge a fhorbairt.
“Bhí sé go deas leabhar a scríobh mar go bhfuil sé éagsúil ó na físeáin is bíonn mé ábalta níos mó smaointe a roinnt agus níos mó focal misnigh a thabhairt do dhaoine.”
As Leitir Ceanainn ó dhúchas, d’fhoghlaim sí a cuid Gaeilge ar scoil. Chuaigh sí ag scoil Bhéarla ach thaitin an Ghaeilge go mór léi agus í sa mbunscoil.
“Bhí an-dúil agam sa Ghaeilge i gcónaí ach sa mheánscoil bhí sé doiligh sult a bhaint aisti mar go raibh strus orm mar gheall ar na scrúdaithe. Nuair a d’fhág mé an mheánscoil bhí Gaeilge mhaith agam ach ní raibh mé in ann comhrá a dhéanamh i gceart. Ní dhearna mé aon staidéar uirthi ar feadh cúpla bliain ach ina dhiaidh sin bhí mé ag iarraidh níos mó a fháil ná an méid den teanga a bhí agam.”
Bíonn daoine a cheapadh go mbíonn a dturas teanga thart nuair a fhágann siad an scoil, a deir an t-údar, ach bíonn neart deiseanna ann filleadh uirthi.
“Nuair a fhágann daoine an scoil síleann siad ‘sin é’ agus ní bheidh Gaeilge ina saol arís. Go minic tagann daoine ar ais ag an teanga. Sin é a rinne mise, tháinig mé ar ais ag an teanga. D’aimsigh mé pobal na Gaeilge.”
Seoladh an leabhar ag ócáid i gCultúrlann Uí Chanáin i nDoire ar an 9 Meán Fómhair. Bhí an t-údar ag caint faoin leabhar ó shin ar chláracha teilifíse agus raidió agus bhí sí ar cuairt ar shiopaí leabhar ar fud na tíre ag síniú cóipeanna.
Tá cur chuige sainiúil sa leabhar agus meascán ábhar ann. Tagann méadú ar an méid Gaeilge atá sa téacs de réir mar a dtéann an léitheoir tríd.
“Ag an tús, tá níos mó Béarla sa leabhar agus méadaíonn an líon focal i nGaeilge de réir a chéile. Nuair a scríobh mé focal i nGaeilge sa leabhar rinne mé iarracht an focal sin a choinneáil i nGaeilge sa gcuid eile den leabhar ina dhiaidh sin. Chuala mé ar ais ó go leor léitheoirí go bhfuil said ag baint sult as an ngné sin. Tá siad ag foghlaim rud beag agus ag tuiscint go bhfuil níos mó Gaeilge acu ná mar a shíleann siad.”
Tá sí ag súil go dtabharfaidh an leabhar cúnamh do dhaoine a mbeadh easpa misnigh orthu i dtaobh a gcuid Gaeilge.
“Téim i ngleic le cuid de na dúshláin a bhíonn ag daoine i dtaobh na Gaeilge. Pléim an náire a bhíonn orainn mar gheall ar bhotúin nó mar gheall nach bhfuil Gaeilge ‘mhaith’ againn. Só tá súil agam go bhfuil sé ag tabhairt muiníne do dhaoine. Tá súil agam go dtuigfidh éinne a léifidh an leabhar go mbíonn daoine eile ag streachailt leis na rudaí céanna is nach gá dóibh a bheith ag streachailt.”
Niall Gòrdan (Niall na Naoi bPionta)
Cheannaigh mé féin an leabhar é láithreach bonn agus is dóigh liom gur leabhar iontach ar fad é!