Is beag duine a bhíonn páirteach i gcomórtas nó i gcoimhlint nach mbíonn súil acu an bua a bheith acu. I Stáit Aontaithe Mheiriceá faoi láthair sin é go díreach atá ag tarlú.
Tá Ron DeSantis agus Nikki Haley sa tóir ar an dara háit i réamhthoghcháin Iowa. Níl aon amhras, is cosúil, ach go mbeidh Donald Trump chun cinn ar an mbeirt acu – deir na pobalbhreitheanna go bhfuil os cionn 70% de thacaíocht an phobail aige.
Tá súil ag DeSantis agus Haley go mbeidh brú ag teacht ar Trump sna seachtainí seo romhainn mar gheall ar na cásanna cúirte éagsúla ina aghaidh. Tá ag éirí le Haley go leor airgid a mhealladh chuici féin, rud a bhíonn cinniúnach in aon fheachtas toghcháin i Meiriceá.
Nuair a thosaigh sé i mbun feachtais bhí DeSantis á chur féin i láthair mar mhalairt ar Trump. Tá na polasaithe céanna aige a théann i bhfeidhm ar lucht leanúna Trump ach cuireann sé i láthair iad ar bhealach níos meáite.
Tá an rud céanna ag tarlú anois le Haley. Tá sí á cur féin i láthair ar bhealach a mheallfaidh vótaí ó chuid de na neamhspleáigh a bheidh ag vótáil in Iowa. Ná déanadh muid dearmad go raibh Nikki Haley ina hambasadóir sna Náisiúin Aontaithe agus gurb é Trump a d’ainmnigh sa ról sin í. D’eascair sí go polaitiúil ó ghluaiseacht an Tea Party. Tá sí ag iarraidh a chur in iúl gur aici féin atá an seans is fearr an ceann is fearr a fháil ar Joe Biden i mí na Samhna.
Braithfidh sé sin ar fad ar thorthaí na gcásanna cúirte ar fad in aghaidh Trump. An tseachtain seo chuaigh sé chun cúirte in Washington ag maíomh nach féidir de réir an Bhunreachta cúiseanna a chur in aghaidh Uachtaráin i gcoireanna feidearálacha agus go bhfuil díolúine aige óna leithéid. Tá súil ag foireann Trump go gcuirfidh na hiarratais agus na hachomhairc ar fad moill ar na trialacha san 91 cúis atá ina aghaidh agus dá réir go mbeidh Super Tuesday thart, ar an 5 Márta, agus an t-ainmniúchán faighte aige.
An breithiúnas is suntasaí a tharlóidh sna seachtainí seo romhainn an breithiúnas a dhéanfar faoi alt 3 den 14ú leasú ar an mBunreacht. Tá leas á bhaint as an bhforáil le cosc a chur ar Trump a bheith ar an bpáipéar ballóide ar an mbunús gur ghlac sé páirt in éirí amach in aghaidh an rialtais ar an 6 Eanáir 2021 agus ina chuid iarrachtaí toradh an toghcháin in 2020 a chur ar neamhní.
Cuirfear tús leis na héisteachtaí sin ar an 8 Feabhra. An mbeidh breithiúnas againn roimh Super Tuesday? Caolseans, ach idir an dá linn tá Haley agus DeSantis ag ionsaí a chéile le súil agus go mbeidh siad sa dara háit in Iowa. Iad ag iarraidh a bheith faoi réir sa gcás go mbeadh folúntas Poblachtánach le líonadh sna míonna seo romhainn ar threoir ón gCúirt Uachtarach, b’fhéidir?
Fág freagra ar 'Is túisce a chuirfeadh Trialacha Trump cor san fheachtas ná a chéilí comhraic'