Dar le cuid de thuataí tuisceanacha pharóiste Fionntrá, is é an Dr. Monsignor Pádraig Ó Fiannachta, go méadaítear a ghlóir sna Flaithis, a sheol an brothall seo chugainn ionas go bhféadfaí séipéal an pharóiste sin a dheisiú gan dua gan doineann.
Tá corp an Mhoinsíneoir, a d’éag i mí Iúl 2016, curtha i gclós an tséipéil agus, le déanaí, cuireadh fuinneog gloine dhaite i gcuimhne an Fhiannachtaigh sa tséipéal.
Le tamall de laethanta tá obair dheisiúcháin ar siúl ar dalladh ar an séipéal seo, a tógadh i ndeireadh an naoú haois déag agus atá tiomnaithe do Naomh Caitlín, pátrún pharóiste Fionn Trá, a ndeirtear fúithi gurb í Catherine Alexandria í.
In Ard an Bhóthair atá an séipéal agus trasna an bhóthair uaidh tá tábhairne cáiliúil Pháidí Uí Shé, nach maireann.
Fad a bheidh an séipéal á dheisiú beidh an tAifreann á léamh gach tráthnóna Sathairn sa Halla Pobail i gCeann Trá. Beidh searmanais shochraide do pharóisteánaigh Fionntrá ar bun i Séipéal Naomh Muire sa Daingean.
Fág freagra ar 'An ghrian ag cuidiú le hathchóiriú Shéipéal Fionntrá'