Nach deas é? ‘Tá sé sna cuacha deireanacha…’

Mír rialta ó scríbhneoirí éagsúla faoi nathanna cainte a thugann léargas ar shaibhreas, ar shaíocht agus ar aclaíocht na teanga

Nach deas e? Bladerunner

Tá sé ar a liosta ag an bhfiach dubh, a deirtear faoi dhuine a bhfuil baol báis air. Tá sé sna cuacha deireanacha a deirtear nuair a bhíonn sé ag saothrú an bháis. Cheapfá go mb’fhéidir go bhfuil baint éicint aige leis na cuacha deireanacha a imíonn as Éirinn ach ar ndóigh níl: cuach eile atá i gceist, osna nó tromosna.

Bíonn clochar an bháis ann an uair sin. Deir na foclóirí linn gurb ionann clochar agus glothar. Glugar an bháis a thugtaí i Ros Muc air.

Dúirt tráchtaire amháin go bhfuil an glór atá ag Bob Dylan chomh garbh anois gur cosúil le glothar an bháis é! I bhfad uainn an lá nó an oíche agus chuile anachain dá réir. Tá sé sna cuacha deireanacha. Nach deas é?