Nasc le cothú idir pobal na Móhácach agus muintir na Ceathrún Rua

Tabharfaidh scoláireacht nua deis do scoláirí theanga na Móháicise ó cheantar Kahnawaketo i gCeanada freastal ar chúrsa Gaeilge ar an gCeathrú Rua i gConamara

Nasc le cothú idir pobal na Móhácach agus muintir na Ceathrún Rua

Táthar ag súil nasc nua a chruthú idir muintir na Ceathrún Rua agus pobal na Móhácach le scoláireacht nua Gaeilge-Móháicise.

Aire Stáit na Gaeltachta Seán Kyne agus Ceann Fine Náisiún na Móhácach Joseph Tokwiro Norton a d’fhógair an scoláireacht tráthnóna, scoláireacht a thabharfaidh deis do scoláirí theanga na Móháicise ó cheantar Kahnawaketo i gCeanada freastal ar chúrsa Gaeilge ar an gCeathrú Rua.

Dámhachtain í seo a bheidh á riar ag Fondúireacht Ollscoil Éireann Cheanada agus beidh an chéad scoláire Móháicise ar an gCeathrú Rua an samhradh seo. Tá an scoláireacht á chomhaoiniú ag an gComhairle Mhóháicise agus Roinn na Gaeltachta faoi scéim dámhachtainí chlár Gaeilge na Roinne.

I ráiteas a chuir Roinn na Gaeltachta amach tráthnóna dúradh go rabhthas ag súil “ceangail a chothú” idir na Móhácaigh agus muintir na Ceathrún Rua a bheadh “bunaithe ar chúrsaí teanga, cultúir agus pobail”.

James Kelly,  Joseph Tokwiro Norton, agus Seán Kyne TD. Pictiúr: Mark Stedman

Is pobal ársa iad Móhácaigh Kahnawá:ke (Kahnawákeró:non) atá ar cheann de na hocht pobal i náisiún na Móhácach. Cuid lárnach dá gcultúr agus dá bhféiniúlacht is ea an Mhóháicis, cé go bhfuil sí faoi bhrú ag an mBéarla.

Dúirt Aire Stáit na Gaeltachta go raibh sé ag súil go mór le fáilte a chur roimh na scoláirí as ceantar Kahnawaketo.

“Onóir a bheidh ann fáilte a chur roimh scoláire Móháicise chuig an gCeathrú Rua. Tá aithne agus eolas ar na Móhácaigh ar fud an domhain maidir leis an gcultúr saibhir agus an stair a bhaineann leo.  Mar aon le muintir na hÉireann, féachann siad chun cinn le fonn agus tá meas mór acu ar a dteanga agus a gcultúr.

“I gcás mhuintir na Ceathrún Rua, measaimid go bhféadfadh an scoláireacht seo a bheith ar an gcéad chéim i dtreo cairdeas ar leith a fhorbairt leis na daoine breátha seo.”

Dúirt Ceann Fine na Móhácach Joseph Tokwiro Norton go raibh sé ag súil le toradh na scoláireachta nua a fheiceáil.

Is léir go bhfuil go leor cosúlachtaí idir na Móhácaigh agus muintir na hÉireann – an sprid atá iontu, an tábhacht a leagann siad ar an stair agus ar an bpobal.  Tá éagsúlachtaí ann freisin agus sa chomhthéacs sin sílim go bhfuil go leor le foghlaim againn óna chéile – táimid ag súil go mór leis an scoláireacht seo,” arsa Joseph Tokwiro Norton.

Dúirt James Kelly, Príomhfheidhmeannach Ollscoil Éireann Cheanada:

“An misean atá ag an ICUF ná naisc a chothú idir Ceanada agus Éirinn, cur leis an gcairdeas agus an gcomhoibriú idir an dá thír. Ag smaoineamh ar Cheanada, ní mór dúinn smaoineamh ar na bundúchasaigh atá ansin leis na mílte blianta. Is cuid ríthábhachtach de shaol an lae inniu i gCeanada iad pobal na Móhácach agus tá ríméad orainn a bheith ag tacú leis an bpáirtnéireacht seo agus is mór an onóir dúinn é.”

Fág freagra ar 'Nasc le cothú idir pobal na Móhácach agus muintir na Ceathrún Rua'