Tá mé ag obair ar nós an néiléara (fear déanta tairní) a déarfadh an té a bheadh thar a bheith cruógach. Tharlódh sé go mbeadh sé chomh cruógach le duine a mbeadh a mhéar i bpoll tarathair. Bheadh a dhá cheann i dtalamh le díocas. Bheadh sé luite isteach ar an obair agus taos á choinneáil aige leis an oigheann. Fear dícheallach, dlúsúil, treallúsach a bheadh ann. Déarfadh duine eicínt go mbeadh sé gnóthach ach mheabhródh duine eile gur tráthnóna a bhíonn an falsóir gnóthach. D’fhéadfaí a rá go deimhin go mbeadh sé chomh saothrach le beach. Bheadh sé ar a bhionda ar chuma ar bith. Dá dtuirseodh sé é féin rómhór déarfaí gur chuir sé a gha gig amach.
Nach deas é? Bheith ag obair ar nós an néiléara
Mír rialta ó scríbhneoirí éagsúla faoi nathanna cainte a thugann léargas ar shaibhreas, ar shaíocht agus ar aclaíocht na teanga
Fág freagra ar 'Nach deas é? Bheith ag obair ar nós an néiléara'