An té a bheadh ag baint deataigh as an airgead bheadh sé á chaitheamh go rábach.
Bíonn simléar deataigh ann. Tá an simléar ag plúchadh deataigh, a déarfaí.
Mura dtarraingeoidh sé deatach tarraingeoidh sé caint a dúradh faoi shimléar a rinneadh go dona.
Bíonn iasc deataigh ann agus d’fhéadfadh súile deataigh a bheith i nduine nuair a ghoillfeadh an deatach air.
Tá deatach acu a déarfaí nuair a thabharfaí faoi deara go raibh dream de na comharsana éirithe ar maidin.
Tá trí scór deatach ann – tithe a bhfuil cónaí iontu.
Caora ó gach deatach – cíos de chineál éigin in aghaidh an tí a bhí ansin.
An áit a mbíonn deatach bíonn tine.
Mo dheatach ort – eascaine.
Is deas an radharc deatach ag éirí as uisce.
Tá deatach allais as.
Bhain sé deatach as an gcapall le neart siúil.
Ní fiú buidéal deataigh é – ní fiú tada é.
Bhí sé ina chrústóir chomh mór is nach dtabharfadh sé deatach na tine uaidh.
Bhí sé ina dheatach eatarthu – troid mhór.
Ní raibh dé ná deatach air – radharc ar bith.
Bhain sé deatach as an urlár – ag damhsa.
Ní gleann folamh gleann a mbíonn deatach ann.
Gach saor go deatach agus gach sleádóir go móin shnáithíneach – mholtaí an saor a chuirfeadh simléar maith i dteach agus an sleánadóir a bheadh in ann móin shnáithíneach a bhaint go maith.
Sonas i ndiaidh na sraoilleachta is deatach i ndiaidh na breácha.
Ba mhinic deatach mór ar dhrochthine.
Is fearr an deatach ná gaoth an tseaca – is fearr cur suas leis an deatach ná an doras a oscailt is an ghaoth fhuar a ligean isteach.
Trí naimhde na colla, gaoth, deatach, dreancaidí.
Seosamh eile.
“Is fearr an deatach ná gaoth an tseaca – is fearr cur suas leis an deatach ná an doras a oscailt is an ghaoth fhuar a ligean isteach.”
Ha ha! Bheul, níl sé seo fíor, i comhthéacs ár n-eolas ar shláinte riospráide agus scapadh Covid.