Thug Aontas na Mac Léinn in Éirinn (an USI) páipéir mhóra bhallóide agus bosca mór ballóide chomh fada le Teach Laighean inniu agus teachtaireacht láidir acu: ‘Nílimid sásta leis an ‘béalghrá’ a thugann an t-aos polaitiúil don teanga.’
Tá an tAontas ag iarraidh aird a tharraingt ar an dtábhacht, dar leo, a bhaineann le ceist na Gaeilge agus na Gaeltachta san olltoghchán romhainn agus iad ag impí ar dhaoine vóta a chaitheamh ar son na Gaeilge agus na Gaeltachta.
Níl na mic léinn sásta fanacht ina dtost a thuilleadh faoi chás na teanga, a dúirt Aedraen Ó Dubhghaill, Leas-Uachtarán don Ghaeilge san Aontas.
“Tuigeann Aontas na Mac Léinn in Éirinn á thábhachtaí is a bheidh na chéad chúig bliana eile i leith fhorbairt agus fhás na teanga. Níl mic léinn na hÉireann sásta níos mó, fanacht ar an taobhlíne, agus páirtithe polaitiúla a ligean le ‘béalghrá’ nó ‘lip service’ a thabhairt don teanga.
“Is é sin an fáth go bhfuil muid ag éileamh gníomhaíochta chomhtháite ó na hionadaithe polaitiúla agus ó na hiarrthóirí olltoghcháin ar fad, ” a dúirt Aedraen Ó Dubhghaill, Leas-Uachtarán don Ghaeilge san Aontas.
I ráiteas a d’eisigh Aontas na Mac Léinn dúradh go raibh eachtraí éagsúla ann le sé mhí anuas a spreag mic léinn Ghaeilge agus Ghaeltachta chun gnímh.
I measc na n-eachtraí a luaigh an tAontas bhí conspóid na haersheirbhíse go hoileáin Árann; cás Eircode agus na 50,000 logainmn Gaeilge a fágadh ar lár; agus scéal bhéaltriail na Gaeilge don Teastas Sóisearach. Deir Aontas na Mac Léinn gur chuir na conspóidí sin ar fad “as do dhaoine go mór”.
Idir an dá linn, tá Aontas na Mac Léinn ag éileamh ar gach páirtí polaitiúil a dtacaíocht a thabhairt don phlean infheistíochta a sheol Conradh na Gaeilge i dTeach an Ard-Mhéara inné.
Fearn
Agus shíl mise go mbeadh siad ag éileamh teagasc sa chúrsaí acu i nGaeilge!