Tá Rúnaí Stáit Thuaisceart Éireann i ndiaidh éirí as de bharr drochshláinte.
Thug James Brokenshire, atá ina Rúnaí Stáit don Tuaisceart ó mhí Iúil 2016, le fios go raibh faoi éirí as agus Príomh-Aire na Breataine ar tí atheagar ar a comhaireacht a fhógairt.
Tuairiscítear go mbeidh an MP do Old Bexley agus Sidcup ag dul faoi scian sna seachtainí romhainn amach agus lot ar a scamhóg dheas.
Tá dlúthbhaint ag Brokenshire agus Príomh-Aire na Breataine Theresa May le chéile agus bhí sé ina aire don imirce san Oifig Gnóthaí Baile le linn do May a bheith i bhfeighil ar an oifig sin. Meastar nár bhaol dó an t-atheagar atá le fógairt inniu.
Fágann imeacht Brokenshire go mbeidh Rúnaí Stáit nua ag an Tuaisceart ag pointe an-leochaileach sna hiarrachtaí teacht ar réiteach ar an tsáinn pholaitiúil agus feidhmeannas Stormont a athbhunú.
Fág freagra ar 'James Brokenshire éirithe as mar Rúnaí Stáit an Tuaiscirt de bharr drochshláinte'