Imreoir Gaeltachta ainmnithe mar pheileadóir mionúir na bliana

Imreoir óg Gaeltachta as an Spidéal, Tomás Farthing, atá roghnaithe mar Pheileadóir Mionúir na Bliana 2022.

Tá cúigear eile d’fhoireann na Gaillimhe a bhuaigh Craobh na hÉireann an mhí seo caite ainmnithe ar an bhfoireann a d’fhógair urraí an chomórtais, Electric Ireland inniu. Ba é ógánach Bhaile an Domhnalláin ‘Laoch na hImeartha’ sa gcluiche in aghaidh Mhaigh Eo agus thuill an gradam céanna ina mbua ar Dhoire sa mbabhta leathcheannais.

Uimhir 2 a bhí ar gheansaí Farthing le linn an chomórtais, ach bhí lámh aige i ngluaiseachtaí go leor a thuill scóranna tábhachtacha d’fhoireann Alan Glynn a buaileadh faoi thrí laistigh dá gcúige féin i dtús an tséasúir – faoi dhó in aghaidh Mhaigh Eo (0-4 in aghaidh 1-15 agus 0-13 in aghaidh 0-7) agus in aghaidh Liatroma (0-8 in aghaidh 3-12).

Bhí Farthing gortaithe i dtús an chomórtais agus níor facthas i mbun imeartha é go dtáinig an dara cluiche in aghaidh Mhaigh Eo i mí an Mheithimh – an cliseadh leathdhosaen cúilíní sin i gcluiche ceannais an chúige.

Sé lá dár gcionn bhí sé i mbarr a mhaitheasa i mbabhta ceathrú ceannais na hÉireann nuair a bhuaigh Gaillimh gan choinne ar fhoireann Átha Cliath a raibh 4-23 scóráilte acu sa dá chluiche a d’imir siad i gCraobh Laighean.

Ní hamháin gur choinnigh Tomás agus cosantóirí eile na Gaillimhe a gcéilí comhraic taobh le sé chúilín, ach tháinig sé fhéin aníos an pháirc agus scóráil ceann do Ghaillimh ag am cinniúnach.

Ag bisiú a bhí sé chuile uair a ndeachaigh sé i mbun páirce as sin amach.