- Tá €500 íoctha ag 552 iarthóir le bheith ina Teachta/Theachta Dála
- Fir 387 díobh sin
- As an 552 iarrthóir sin, leathchéad acu, ar a mhéid, a chuala mé ar aon chlár raidió agus chuala mé an caoga sin leathchéad uair
- Bhí béalóg ar go leor de na teachtaí Dála an chuid is mó den fheachtas agus gan cead labhartha ach ag na daoine tofa.
- Nuair a chuir aon teachtaireacht múisiam ar na meáin athraíodh é agus cuireadh gobán sa duine a dúirt é
- Más uait poiblíocht saor in aisce a fháil, bí conspóideach, bíodh sin go mór ar dheis nó i bhfad ar clé
- Ní ceist náisiúnta í an Ghaeilge agus is iomaí iarrthóir atá sách briotach i mBéarla freisin
- Tá iarfheisire Eorpach agus Teachta Dála ag rá gur bua na dteangacha an bua is mó atá aige ach níl aon Ghaeilge aige
- Déanann RnaG agus cuid de na meáin Ghaeilge eile páirtí Sóisialach de na Daonlathaigh Shóisialta agus níor chuala mé fós gur chuir sé aon stuaic orthu
- Tá páirtí againn in aghaidh na déine – níor chuala mé aon pháirtí fós ag rá go bhfuil sé ar son na déine
- Obair mhaslach í an stocaireacht agus bíonn ruibh chantail ar na hiarrthóirí bochta nuair a bhíonn micreafón os a gcomhair
- Ola ar chroí na meán cumarsáide toghchán: is féidir am, foireann, díocas agus samhlaíocht a chaitheamh ar scéal amháin
- ‘Cath’ an meafar is coitianta ar thoghchán, tá ‘bus catha’ ag stáisiún amháin
- Cosnaíonn gach gnáthphóstaer atá ar na cuaillí thart ar €6 an ceann agus caitheann iarrthóirí thart ar €30,000 an duine ar fheachtas. Ach an mbreathnaíonn duine ar bith in airde anois agus fón cliste i ngach lámh?
- Dúntar bunscoileanna go leor lá toghcháin cé go bhfuil ionaid phobail folamh ar fud na háite
- Is grásta ó neamh é suaimhneas Lyric FM aimsir thoghcháin
- Tá an Grand Canyon idir na rudaí a chuireann tráchtairí ó chodladh na hoíche agus an chuid eile againn
- Caitheann polaiteoirí an iomarca ama leis na mionrudaí agus déantar siléig sa mbonnchloch
- Trua agus ómós atá agamsa d’aon duine a roghnaíonn an tír seo a shlánú i nDáil Éireann agus is cuma liom céard is bun lena n-aisling. Go n-éirí chomh maith leo agus a thuilleann siad!
- Gabh amach ag vótáil nó stop ag cnáimhseáil!
Fág freagra ar 'CÚLÉISTEACHT TOGHCHÁIN: Ní ceist náisiúnta í an Ghaeilge – 20 ceacht toghcháin'