Tá comhalta ar Bhord Fhoras na Gaeilge curtha ar fionraí ar feadh tréimhse éiginnte.
Tuairiscíodh ar Nuacht TG4 tráthnóna gur tógadh an cinneadh an comhalta a chur ar fionraí ag cruinniú de chuid Bhord na heagraíochta trasteorann ar an 29 Iúil.
Tá achomharc á dhéanamh ag an gcomhalta faoin gcinneadh é a chur ar fionraí.
De réir na tuairisce ar Nuacht TG4 anocht níor ainmníodh ag an gcruinniú Boird i mí Iúil an comhalta atá curtha ar fionraí agus níor thug an coiste osradhairc a chinn an comhalta a chur ar fionraí aon mhíniú ar an gcúis go raibh sé á chur ar fionraí.
Tuairiscíodh anocht gur lorg Foras na Gaeilge cead ón gCoiste Aireachta Thuaidh Theas bliain go leith ó shin rialacha nua a thabhairt isteach chun déileáil le ceisteanna smachta i gcás comhaltaí boird.
Tá Cathaoirleach eatramhach Bhord an Fhorais, Marcus Mac Ruairí, ina bhall den choiste osradhairc a chinn go ngearrfaí tréimhse fionraíochta éiginnte ar an gcomhalta boird atá ar fionraí le breis agus mí anuas.
Tuairiscíodh anocht gur iarr an comhalta go bpléifí a chás i mBéarla, ach nár ghlac an bord leis an éileamh sin.
Ní raibh Foras na Gaeilge sásta aon ráiteas a thabhairt do Nuacht TG4 faoin scéal toisc gur bhain sé, a dúradh, le gnóthaí “inmheánacha” an Fhorais.
Fág freagra ar 'Comhalta de chuid Bhord Fhoras na Gaeilge curtha ar fionraí'