An t-iar-aire stáit Gaeltachta Seán Kyne ag filleadh ar Dháil Éireann agus toghchán Ghaillimh Thiar buaite aige

Tá na t-iar-aire stáit Gaeltachta Seán Kyne ag filleadh ar Dháil Éireann agus an bua faighte aige i bhfothoghchán Ghaillimh Thiar.

Fuair an seanadóir ó Fhine Gael, arb as Maigh Cuilinn i nGaeltacht na Gaillimhe dó, an ceann is fearr ar iarrthóir Independent Ireland Noel Thomas.

Chuaigh Kyne chun cinn ar Thomas ar deireadh sa chomhaireamh deireanach, an 11ú ceann, a bhuíochas do vótaí aistrithe.

Fuair Kyne 4,249 vóta aistrithe ó Helen Ogbu Pháirtí an Lucht Obre, rud a chuir go maith chun cinn ar Thomas é, a fuair 1,273 vóta aistrithe.

D’fhág sin 19,218 vóta ag Kyne sa deireadh agus é go maith chun cinn ar Thomas ar 16,519.

Lá maith a bhí ann d’Fhine Gael, go háirithe toisc gur rud annamh é an bua a bheith ag páirtí rialtais i bhfothoghchán.

Lá mór a bhí ann do Sheán Kyne féin chomh maith a bhfuil teacht aniar iontach déanta aige ón olltoghchán deireanach.

Bhí sé ag smaoineamh an uair sin ar éirí as an bpolaitíocht ar fad nuair a theip air an suíochán Dála a bhuaigh sé in 2011 agus in 2016 a bhuachan ar ais.

Tháinig Helen Ogbu, iarrthóir pháirtí an Lucht Oibre, sa tríú háit le 5,462 vóta céadrogha.

Toghadh Seán Kyne chun na Dála den chéad uair in 2011 nuair a fuair sé an cúigiú suíochán i nGaillimh Thiar agus gan le spáráil aige ach 17 vóta.

Toghadh an athuair é in olltoghchán 2016 nuair a fuair sé an tríú suíochán sa dáilcheantar.

Ceapadh an bhliain chéanna é ina aire Stáit don Ghaeltacht post a bhí aige ar feadh dhá thréimhse, idir 2016-2017 agus idir 2018-2020.

Faoin am a ceapadh ina aire stáit é bhí feabhas mór tagtha ar Ghaeilge Kyne ó chéadtoghadh ina Theachta Dála.

Murab ionann is an uair sin, bíonn Kyne go mór istigh leis féin anois agus é faoi agallamh ar na meáin Ghaeilge.

Chaill sé a shuíochán Dála in 2020 agus ceapadh ina sheanadóir é.

Nuair nár éirigh leis a shuíochán Dála a fháil ar ais in 2024 toghadh chun an tSeanaid arís é.

Daniel Ennis ó na Daonlathaithe Sóisialta a bhuaigh fothoghchán Bhaile Átha Cliath Láir. Fuair 3,744 vóta aistrithe ó Janet Horner an Chomhaontais Ghlais sa naoú comhaireamh rud a d’fhág 12,050 vóta aige agus é go maith chun cinn ar Janice Boylan Shinn Féin ar 7,787.