Comhairle bhreise curtha ar fáil do mhúinteoirí Ardteiste faoi mharcanna bónais Gaeilge

Tá comhairle bhreise curtha ar fáil ag an Roinn Oideachais do scoileanna maidir leis na marcanna bónais a bhíonn le fáil ag daltaí a thugann faoi scrúdú na hArdteiste i nGaeilge.

Scála aistritheach a bhíonn anseo a bhíonn níos tairbhí don té a bhfuil marc faoi 75% aige, mar is fiú 10% bónais dó é i gcuid mhaith ábhar ach laghdaíonn an bónas uaidh sin suas.

Deirtear le múinteoirí atá ag tabhairt marcanna measta dá ndaltaí gan marcanna bónais a chur lena marc ach é a chur sa gcomhaireamh agus an marc sin á bhronnadh ag an gcomh-mheasúnú sa scoil.

Aon mhúinteoir nach dtuigeann scála aistritheach an bhónais don dalta a dhéanann a scrúdú as Gaeilge iarrtar orthu dul go láithreán gréasáin Choimisiún na Scrúduithe Stáit.

Deirtear sa gcáipéis léirmhíniúcháin a foilsíodh inné go raibh múinteoirí ag fiosrú faoi fheidhmiú an bhónais ar an Roinn Oideachais, ach moltar do mhúinteoirí gan a bheith ag ríomh an bhónais as féin ar chúpla cúis.

Don obair scríofa amháin a thugtar an bónas, a deirtear.

Mar sin in ábhar praiticiúil níor mhór an obair phraiticiúil agus an obair scríofa a dhealú sula ríomhfaí an bónas agus ní bheadh sin éasca.

Níl sé inmholta ach an oiread ó tharla gur marc bunaithe ar gach gné d’obair an dalta, roimh dhúnadh na scoileanna sa Mhárta, an breithiúnas atáthar a iarraidh ar mhúinteoirí i mbliana.

B’fhearr go mór go n-úsáidfeadh múinteoirí a mbreithiúnas agus a dtaithí ar thionchar an bhónais ar thorthaí daltaí sa scoil roimhe seo, a deirtear.

Má cheapann múinteoirí ábhair nó an scoil go dteastaíonn eolas níos praiticiúla uathu, maítear gur leor dóibh na ceithre threoir seo:

• Don pháipéar scríofa amháin a thugtar bónas
• Bheith ar an eolas cén bónas atá ag gabháil leis an ábhar faoi leith sin – bíodh sin 10%, 5% nó gan aon bhónas
• Scála aistritheach é an bónas (ag laghdú ó 10%) d’aon dalta a fhaigheann 75% nó níos mó (mar shampla ní bheadh ag an duine a fuair 75% ach bónas 7.5% den mharc sin agus 0% a gheobhadh dalta an 100%)
• Tá 10% de bhónas ag gabháil don pháipéar scríofa sa dá ábhar nua Polaitíocht agus an tSochaí agus Corpoideachas (páipéar scríofa) agus 5% an bónas atá ag dul don Eolaíocht Ríomhaireachta.

Tugtar treoir sa gcáipéis chomh maith faoi dhá ghné eile den mheasúnú scoile –measúnú saothar daltaí atá faoi mhíchumas agus conas a bheith san airdeall gan a bheith claonta i leith nó in aghaidh daltaí ar leith, fiú más i ngan fios duit féin atá an chlaontacht sin.