Tá duine le ceapadh a dhéanfaidh bainistiú ar Ionad na nImirceach i gCarna, Conamara.
Tá an tIonad tógtha anois agus é le hoscailt go hoifigiúil ar an 12 Bealtaine.
Ionad caidrimh agus siamsaíochta a bheas ann do mhuintir na háite agus comhartha ómóis do na daoine a chuaigh ar imirce. Tabharfar eolas cuimsitheach ann ar stair na himirce.
Is é Méara Bhostúin, Marty Walsh, a dhéanfas an oscailt oifigiúil. Táthar ag súil le hos cionn dhá scór cuairteoir ar fad as Meiriceá i gcomhair na hócáide.
Beidh sé de dhualgas ar an duine a cheapfar sa bpost cúrsaí turasóireachta a chur chun cinn freisin agus mairfidh an ceapachán dhá bhliain.
Post é seo a bhfuil tacaíocht á fháil aige ó Údarás na Gaeltachta mar go mbeidh an té a cheapfar páirteach i ngréasán foghlama a bhaineann le tograí straitéiseacha turasóireachta ar fud na Gaeltachta ar fad.
Duine acmhainneach agus oibrí díograiseach atá ag teastáil, a deir lucht an Ionaid.
Níor mhór scileanna maithe ríomhaireachta agus eolas ar na meáin shóisialta a bheith ag an té a cheapfar. Theastódh Gaeilge mhaith agus ábaltacht ar ábhar poiblíochta a chur ar fáil agus ar phreasráitis a scríobh i nGaeilge agus i mBéarla.
Tabharfar aird faoi leith ar thaithí i gcúrsaí gnó nó pobail agus ar dhuine a bheadh solúbtha ó thaobh uaireanta oibre de.
€25,000 sa mbliain an tuarastal atá á thairiscint, sin agus costais atá le socrú. Tá tuilleadh eolais le fáil ó foram@eircom.net.
Fág freagra ar 'Bainisteoir le ceapadh ar Ionad nua na nImirceach i gCarna'