Tá sé molta ag an Roinn Oideachais go mbainfeadh múinteoirí teanga úsáid as an Intleacht Shaorga (AI) le comhráite samplacha, liosta focal, agus leideanna a chumadh do dhaltaí scoile.
Sa cháipéis Treoir maidir leis an Intleacht Shaorga i Scoileanna a d’fhoilsigh an Roinn Oideachais inniu, maítear go bhféadfadh AI “tacú le múinteoirí agus le ceannairí scoile in go leor réimsí”. I measc na réimsí sin a luaitear sa cháipéis tá “cuidiú le pleanáil curaclaim agus ceachta” – réimse ina luaitear an múineadh teanga.
Deirtear go bhféadfaí an AI a úsáid le “bonn a chur faoi ábhar foghlama” le freastal ar “riachtanais éagsúla foghlaimeoirí”. Sa sampla a thugtar, úsáideann an múinteoir AI le comhráite sa sprioctheanga a chumadh agus liosta stór focal a chur ar fáil dá dhaltaí.
“Féachann múinteoir teangacha iasachta nua-aimseartha le cabhrú le mic léinn idirphlé gearr a chumadh. Baineann an múinteoir úsáid as AI giniúnach chun comhráite samhla a chur ar fáil ag leibhéil éagsúla castachta chomh maith le tosaitheoirí abairtí agus liostaí stór focal.
“Déanann an múinteoir athbhreithniú ar an ábhar a ghintear ar mhaithe le cruinneas agus oiriúnacht sula gcuirtear ar fáil do dhaltaí é mar thacaíocht chun a gcomhphlé féin a fhorbairt,” a scríobhadh sa sampla den úsáid a d’fhéadfaí a bhaint as AI sa seomra ranga.
Luaitear freisin sa cháipéis go bhféadfaí AI a úsáid le comhfhreagras le tuismitheoirí a aistriú go teangacha éagsúla. Deirtear go mb’fhéidir go mbeadh locht áirithe ar an aistriúchán a sholáthrófaí ach go gcinnteofaí go mbeadh “teacht ag gach tuismitheoir ar eolas an-tábhachtach”. Moltar go n-úsáidfí AI leis an mbunteachaireacht atá le haistriú a scríobh freisin.
“Úsáideann múinteoir uirlis AI giniúnach chun cabhrú le cumarsáid ríomhphoist a dhréachtú do thuismitheoirí faoi thuras allamuigh atá le teacht. Ansin úsáideann siad uirlis aistriúcháin chun an ríomhphost a thiontú go teangacha baile na ndaltaí go léir. Cé go mb’fhéidir nach bhfuil an t-aistriúchán gan locht, cabhraíonn sé lena chinntiú gur féidir le gach tuismitheoir rochtain a fháil ar an bpríomhfhaisnéis,” a scríobhadh sa cháipéis.
Dúirt Ard-Rúnaí na Roinne Oideachais, Bernie McNally, gur féidir leis an AI “tacú leis an teagasc agus leis an bhfoghlaim”, agus cabhrú le daltaí a barr a gcumais a bhaint amach.
“Nuair a úsáidtear go freagrach í, ar bhealach atá pleanáilte agus eolasach, tá sé d’acmhainn ag AI tacú leis an teagasc agus leis an bhfoghlaim, agus cabhrú le daltaí a n-acmhainneacht a bhaint amach.
“Sa chéad leagan seo den treoir, soláthraítear cúlra agus comhthéacs tosaigh maidir le AI sa teagasc agus san fhoghlaim, agus eolas faoi na deiseanna agus leis an mbaol a bhaineann lena húsáid,” a dúirt McNally.
Ar na bealaí eile a mholtar sa cháipéis do mhúinteoirí le leas a bhaint as an AI, tá “acmhainní teagaisc agus foghlama saincheaptha a chruthú”, “torthaí foghlaimeoirí a shoiléiriú agus a spíonadh amach”, agus “ábhar a chuíchóiriú agus a eagrú”.
Fág freagra ar 'An Intleacht Shaorga molta ag an Roinn Oideachais mar áis do mhúinteoirí teanga'