Seoladh leagan aipe de téarma.ie i nDún Dealgán Dé Céadaoin seo caite.
Tuairiscíodh ar an suíomh IrishCentral.com gurbh é an dalta meánscoile Cormac Kinsella, 14, a chruthaigh an aip neamhoifigiúil agus a nocht i gColáiste Lú an tseachtain seo caite í.
Tá leagan iOS agus Android den aip ar fáil a ligeann d’úsáideoirí an Bunachar Téarmaíochta a chuardach go héasca ar ghutháin chliste agus ar thaibléid.
Mhol a mhúinteoirí do Chormac úsáid a bhaint as Téarma.ie (nó Focal.ie mar a thugtaí air) ach ní raibh aip den suíomh ar fáil. Chonacthas do Chormac go raibh gá le leagan aipe den bhunachar téarmaíochta agus go mba mhór an cúnamh é do lucht úsáide an tsuímh dá mbeadh teacht ar a leithéid d’aip saor in aisce. Thug Cormac air féin an aip a chruthú de mhaoil a mhainge agus tá fáil anois ag an bpobal ar an leagan móibíleach de Téarma.ie gan ach cnaipe a bhrú.
Dúirt Cormac go dtabharfadh sé an aip do lucht bainistíochta téarma.ie dá mba mhian leo í a fháil uaidh. Dúirt bainistíocht an tsuímh le Tuairisc.ie áfach nach mbeadh aon ráiteas á eisiúint acu maidir leis an aip faoi láthair.
Ní hé seo an chéad aip a rinne Cormac Kinsella. Go deimhin, tá a comhlacht féin aige i gcomhar lena chara Cian Martin-Bohan. Marbo Kinsella Software ainm an chomhlachta.
Tá trí aip eile forbartha ag an gcomhlacht, ceann a phléann le taighde ar chúrsaí ceoil, ceann a ligeann don úsáideoir ábhar a chrochadh ar mheáin éagsúla shóisialta go comhuaineach agus ceann eile a bhaineann le Comhairle Dhigiteach na nÓg – eagraíocht a spreagann an óige an códú a fhoghlaim.
Tadhg
B’fhéidir go bhféadfaí é d’fháil chun app a dhéanamh do Tuairisc.ie !!!