“Tina Turner remains rock’s original Jagger. A primitive force, who glittering in sequins and a gold chain mini skirt, typically assaults the stage in mid-scream with both legs pumping, hips grinding, long mane whirling and her mouth wrapped around some the sexiest sounds ever set to music.”
B’in an cur síos a deineadh san iris People i 1981 ar theacht i láthair stáitse Tina Turner. Ba san agallamh a dhein sí leis an iris sin a nocht sí don saol mór an mhí-úsáid a d’fhulaing sí nuair a bhí sí pósta le Ike Turner ar feadh sé bliana déag. Bhí an gaol agus mhí-úsáid sin ina néal os a cionn ar feadh a saoil, fiú nuair a bhain sí cáil dhomhanda amach.
Tá Tina Turner, nó Anna Mae Bullock, sa Táin ó thaobh an cheoil is í ag truslóg agus ag steipeadaíl ar stáitse ar feadh breis agus caoga bliain. Tá 12 duais Grammy buaite aici, tá breis agus 100 milliún ceirnín díolta aici, ba í an chéad bhean agus an chéad duine den chine dubh a cuireadh ar chlúdach na hirise mór-ráchairte Rolling Stone agus bhí curiarracht Guinness aici i 1988 do thinreamh ag ceolchoirm. B’in breis agus 180,000 duine i Staid Maracanã in Rio de Janeiro. Tá an-tóir i gcónaí ar amhráin cosúil le What’s Love Go To Do With It, The Best agus Proud Mary.
Bhí Tina Turner thuas seal agus thíos seal i rith a saoil, go pearsanta agus go proifisiúnta. Faoi mar a deir sí féin go truacánta ní dheineann na sealanna thuas na sealanna thíos a chúiteamh. Chuaigh sí ón mbeagán go dtí an mórán, ón mórán go dtí an beagán agus ar ais arís. Déanann an clár faisnéise seo cuntas tuisceanach a thabhairt ar a saol eachtrúil.
Tá trí leabhar, ceoldráma agus scannán fúithi tugtha ar an bport cheana féin agus faoi mar a deir sí féin sa chlár faisnéise seo cuirfidh an clár seo clabhsúr le scéal a beatha. Taibhsítear dúinn go bhfuilimid ag fágáil slán léi agus í ag fágáil slán linn. Cé go bhfuil ionchur ann ó Tina féin, a bhfuil an ceithre scór slánaithe aici, braitheann an saothar seo go mór ar ábhar cartlainne, go háirithe ábhar fuaime ón agallamh úd i 1981. Tá raidhse ábhar cartlainne againn dá taispeántais stáitse agus cuirtear cumhacht agus draíocht a taispeántas ina steillbheatha os ár gcomhair.
Cuirtear abhaile orainn arís agus arís eile gur fhág caidreamh na drochíde le Ike Turner a lorg uirthi go pearsanta, agus go proifisiúnta. Tráchtar freisin ar an tógaint chrua a fuair sí ina hóige agus tá an crá croí le sonrú i gcónaí agus í ag cur síos ar an tslí ar thréig an mháthair agus ansin an t-athair an chlann. Thosnaigh sí féin agus Ike ag obair le chéile agus í sna déaga agus bhain an dís acu cáil amach sna blianta a lean.
Léirítear Ike mar dhuine foréigneach, tíoránach, goilliúnach. Ba é a bhaist Tina uirthi i ngan fhios di agus an leasainm bunaithe ar an gcarachtar ón tsraith Sheena: Queen of the Jungle. D’éirigh léi éalú uaidh sa deireadh agus is pinginí pitseála a fuair sí sa cholscaradh; b’éigean di troid lena hainm a choimeád.
Chaith sé blianta ar an imeall go dtí gur dhein sí a híomhá agus a cuid ceoil a athrú ó bhonn sna hochtóidí. Saothar iardhearcach toirtiúil atá anseo a chuireann clabhsúr báúil le scéal an ealaíontóra, bean atá sa Táin le breis agus seasca bliain.
Fág freagra ar 'Clabhsúr cuí curtha ar scéal Bhanríon an Rac'