Insealbhaíodh i mBaile Átha Cliath tráthnóna Micheál Mac Aogáin ina Uachtarán ar Oireachtas na Gaeilge do 2019. Tagann Mac Aogáin, arb as Béal Átha na Sluaighe i gcomharbacht ar Mháirín Ní Chonghaile.
I ráiteas ón Oireachtas dúradh gur shaothraigh Micheál Mac Aogáin “ar an iliomad coistí Oireachtais thar na mblianta” agus gur thuill sé “ardmheas, i measc na n-oifigeach agus na gceoltóirí araon”.
Tá Micheál Mac Aogáin ag tarraingt ar an Oireachtas ó bhí sé ina mhac léinn i mBaile Átha Cliath sna seascaidí. Chuireadh sé isteach ar na comórtais cheoil nó gur ceapadh é ar Choiste Náisiúnta an Oireachtais sna seachtóidí. Bhí baint mhór aige ó shin leis na comórtais uirlise go háirithe.
Dúirt Mac Aogáin tráthnóna gur iomaí “laoch” a mhúscail a ghrá “don cheol, don Ghaeilge agus do na hamhráin dhúchasacha”.
“Tá an tsamhail chéanna sin agam féin do mo théarma mar Uachtarán ar an Oireachtas, tuiscint a leathnú i dtaobh an tsaibhris dhosháraithe sin i saol an duine a chothaítear de réir mar a osclaímid ár n-aigne agus ár gcroíthe do na healaíona agus mar a dhéanann muid a gcuid féin daoibh. Is le gach aon naíonán sa tír an oidhreacht luachmhar atá againn – an Ghaeilge, na taibh-ealaíona dúchasacha, an cultúr, an drámaíocht – na bunchlocha ar a bhfuil gach aon ghníomhaíocht de chuid an Oireachtais tógtha.”
Dúirt Liam Ó Maolaodha, Stiúrthóir an Oireachtais, go raibh “seirbhís dhílis, dhíograiseach” tugtha ag Micheál Mac Aogáin don Oireachtas. “Tá ríméad orm fáilte a chur roimhe mar Uachtarán ar an Oireachtas, eagraíocht a dtug sé tacaíocht chroíúil, fhlaithiúil di i gcónaí. Guím rath agus gach sonas air i mbun na hoifige seo,” a dúirt Liam Ó Maolaodha.
Carmel Nic Airt
Rath Dé ort I mbun do shaothair!
Peadar T Mac Ruairí
Comhgháirdeas Mícheál! Tuillte go maith. Gach rath ort agus ar an Oireachtas.
Pádraig Ó CEITHEARNAIGH
Comhghairdeas a Mhichíl. Muid an-mhórálach asat i mBéal Átha na Slua. Go maire tú do ghradam.