Triúr eile a raibh Covid-19 orthu básaithe, 14 cás nua deimhnithe

Tá triúr eile a raibh Covid-19 orthu básaithe agus 14 cás nua den ghalar deimhnithe, de réir na bhfigiúirí is déanaí ón Roinn Sláinte.

D’fhógair Roinn Sláinte an Tuaiscirt níos túisce tráthnóna go raibh duine amháin eile a raibh an aicíd tolgtha aige básaithe agus deimhníodh dhá chás nua.

2,251 duine ar a laghad atá básaithe in Éirinn ó thús na paindéime, 1,709 duine ó dheas den teorainn agus 542 ó thuaidh di.

30,188 cás den ghalar Covid-19 atá deimhnithe go dtí seo in Éirinn, 25,334 cás ó dheas den teorainn agus 4,854 cás ó thuaidh.

Faoi mheán oíche Dé Domhnaigh, 386,572 tástáil don ghalar a bhí déanta ó dheas ó thús na paindéime. Rinneadh 19,364 tástáil le seachtain anuas agus fuarthas go raibh an galar ar 146 duine. B’ionann sin agus 0.8% de na daoine a tástáladh, i gcomparáid le 1% an tseachtain seo caite agus 1.7% coicís ó shin.

De réir an eolais is déanaí ón Roinn Sláinte, a bhain leis an 25,249 cás a bhí deimhnithe faoi mheán oíche Dé Domhnaigh, an 14 Meitheamh:

• Fir a bhí i gceist le 43% de na cásanna agus mná iad 57%
• An aois airmheáin a bhí ann i measc na n-othar ná 48 bliain d’aois
• Cuireadh cúram san ospidéal ar 3,82 duine, 13%
• As na daoine sin, cuireadh 418 duine in ICU, nó Aonad Dianchúraim.
• Oibrithe sláinte a bhí i gceist le 8,139 cás, 32%
• I mBaile Átha Cliath a bhí an líon is mó cásanna le 12,228 cás, nó 48%, bhí Corcaigh sa dara háit, le 1,533 cás, nó 6%, agus Cill Dara a bhí sa tríú háit le 1,434 cás, nó 6%
• 486 cás a bhí i gcontae na Gaillimhe (1.9%), 308 a bhí i gcontae Chiarraí (1.2%), 470 cás bhí i nDún na nGall (1.9%), 154 cás a bhí i bPort Láirge (0.6%), 805 cás a bhí i gcontae na Mí (3.2%) agus 572 cás (2.3%) a bhí deimhnithe i Maigh Eo
• Scaipeadh sa phobal ba chúis le 38% de chásanna, gartheagmháil le hothar eile ba chúis le 60% agus taisteal thar lear ba chúis le 2%

Tá beagnach mí ann ó deimhníodh cás nua den ghalar Covid-19 i gCiarraí, de réir na staitisticí is deireanaí ón Roinn Sláinte.

24 othar a bhfuil Covid-19 orthu atá sna haonaid dianchúraim, laghdú eile.

71 duine le Covid-19 a bhí sna hospidéil agus 170 eile a meastar an galar a bheith orthu.

Idir an dá linn, d’fhéadfadh druga atá saor agus ar fáil go forleathan cuidiú le daoine, a bhíonn buailte go dona ag an gcoróinvíreas, a shábháil ón mbás.

Deir saineolaithe sa Ríocht Aontaithe gur iontach an dul chun cinn sa bhfeachtas in aghaidh an choróinvíris an t-eolas nua go gcuidíonn dáileog bheag den chóir leighis stéaróideach deicsimeiteasón le daoine a bhfuil an coróinvíreas tolgtha acu agus atá go dona tinn leis.

Tá an druga seo ar cheann de na trialacha atá á ndéanamh ar fud an domhain ar tháirgí atá in úsáid cheana féin i gcúrsaí leighis féachaint an oibreoidís ar an gcoróinvíreas.

Léiríonn na trialacha gur laghdaigh deicsimeiteasón aon trian an baol báis d’othair a bhí ar aerálaithe. Daoine a bhí i dtuilleamaí soláthar ocsaigine, laghdaigh sé an baol báis 20%.

Meastar anois dá mbeadh an druga seo á úsáid ón tús chun cóir leighis a chur ar othair a bhí go dona le Covid-19, go mbeadh 5000 duine sa Ríocht Aontaithe sábháilte ón mbás.

Faoi láthair, níl aon chóir leighis ná vacsaín faofa don Covid-19, an galar a thagann as an gcoróinvíreas nua a bhfuil breis is 431,000 duine curtha den saol aige ar fud na cruinne.

Tá Béising na Síne buailte ag ráig eile den choróinvíreas agus scoileanna uilig na príomhchathrach dúnta ag an gcoimisiún oideachais ansin.

Cuireadh tús le feachtas dian díograiseach eile chun daoine a thástáil agus teagmhálaithe a chuardach nuair a thángthas ar ghrúpa 27 duine ansin a bhfuil an víreas tolgtha acu.

Bhí an galar faoi chois ar fad beagnach sa tSín a bhuíochas don dianghlasáil fhíordhocht agus an tástáil fhorleathan a cuireadh i bhfeidhm ansin ó thús na bliana ach tá 106 nua den ghalar deimhnithe i mBéising le cúig lá.