Sé Disney ceárta na saothar teaghlaigh leis na cianta cairbeacha, saothair neamhurchóideacha chaithiseacha amhail Snow White agus Lion King ag mealladh lucht féachana idir óg agus aosta. Tá gothaí nach beag á gcur orthu féin acu le tamall; tá saothair Marvel ar a n-ardán Disney+ agus ba iad a thug an tsraith iontach Dopesick dúinn le déanaí.
Anois seo chugainn iad le Pam & Tommy, sraith ocht gclár a thugann siar go lár na nóchaidí sinn, tráth arbh réalta idirnáisiúnta í Pamela Anderson agus tráth a raibh cáil bainte amach ag Tommy Lee mar dhrumadóir leis an mbanna miotal trom drabhlásach Mötley Crüe.
Tháinig casadh cinniúnach i saol na beirte, agus an idirlín go deimhin, nuair a thosaigh físeán gnéis dá gcuid ag scaipeadh le cabhair an idirlín. Sé bunús agus scaipeadh an fhíseáin sin bunchlocha an scannáin. Tá cúpla téama sollúnta, suimiúil á gcíoradh ag an scannán, áfach.
An ceann is tromchúisí ná an éagóir a deineadh ar an mbeirt agus an t-ionsaí fíochmhar, neamhthrócaireach a deineadh ar a bpríobháideachas. Bhí aighneas idir Tommy agus fear oibre dá chuid darbh ainm Rand (Seth Rogen). Mar chúiteamh ar íocaíocht ná fuair sé, ghoid sé taisceadán agus ba nuair a d’oscail sé é sin a d’aimsigh sé an físeán. Níl ach trí ghála seolta go dtí seo ach is léir go bhfuil an saothar ag iarraidh cíoradh de shaghas éigin a dhéanamh ar an éagóir sin. Ba chúis mhagaidh iad ag an am agus i dtosach an chéad ghála címid athléiriú ar agallamh Jay Leno le Anderson; agallamh nach mbeadh Leno pioc bródúil as inniu.
Tá an saothar bunaithe ar alt in Rolling Stone a thug taobh Rand den chuid is mó mar aon le tarraingt as dírbheathaisnéis Tommy ó 2004. Ní rabhadar rannpháirteach sa saothar seo in aon chor. Is íorónta an mhaise é go bhfuil an saothar seo ag iarraidh a gceart a thabhairt don bheirt ach níl a nguthanna le sonrú sa saothar agus níor shantaigh siad é. D’fhéadfaí a mhaíomh, dá réir, go bhfuil éagóir á dhéanamh orthu in athuair. Is cinnte go ndéantar iarracht fhónta ar uairibh léargas a thabhairt ar phearsantachtaí na beirte ach is minic sinn i dtaobh le scigphictiúir chomh maith.
Lena chois sin déantar gníomhartha fill Rand a mhaitheamh dó; ní chabhraíonn sé gurb é Seth Rogen geanúil na pleidhcíochta atá sa ról; éiríonn leis bá a cothú do charachtar nach bhfuil sin tuillte aige. Tugann Sebastian Stan agus Lily James faoina gcarachtair le flosc agus tá cad é caint faoin gclaochlú físiúil a tháinig orthu don ról, gach rud ó bhod beochantrónaic go sciathlúireach.
Gné shuimiúil den scéal ná an bhaint a bhí ag an idirlíon le scaipeadh an fhíseáin. Ní raibh an Gréasán Domhanda, mar a thugtaí air, ach ina thús agus tá greann ag baint leis an tslí go bhfuil ar Rand feidhmiú an idirlín a mhíniú. Meabhraítear gur sa tréimhse seo a thosaigh an t-idirlíon ag briseadh an tseanghnáthaimh agus ag seoladh chugainn an ghnímh fill anaithnid agus an saothar mearscaipthe.
Níl an saothar gan a mhaitheasaí ach is dóigh liom go dtiteann sé idir cúpla stól.
Fág freagra ar 'Titeann léamh Disney ar an bhfíseán gnéis idir cúpla stól'