Beidh trí ainm ‘Gaelach’ ar an liosta ainmneacha stoirmeacha a bheidh á fhógairt ag Met Éireann ag meán oíche anocht.
Ag labhairt di le Tuairisc.ie, dúirt Evelyn Cusack, an meitéareolaí aitheanta ó Met Éireann, go mbeidh trí ainm Gaeilge i measc na n-ainmneacha a chuirfidh Met Éireann chun cinn i mbliana.
Dúirt Cusack gur i gcomhar le chéile a thagann Met Éireann agus Oifig Met na Breataine gach bliain ar liosta ainmneacha do stoirmeacha. Sé cinn d’ainmneacha ó Met Éireann a bheidh ar an liosta nua agus tiocfaidh an chuid eile ó Albain, ó Shasana agus ón Bhreatain Bheag.
Reáchtáil Met Éireann pobalbhreith ar na meáin shóisialta ag an deireadh seachtaine agus moltaí á lorg ón phobal acu d’ainm baineann i nGaeilge a thosaíonn leis an litir ‘S’.
As na ceithre rogha a thug Met Éireann ar na meáin shóisialta, ba é an t-ainm ‘Saoirse’ is mó a thaitin le daoine a thug freagra ar an suirbhé. Ba iad ‘Sadhbh’, Siobhan (Siobhán) agus Sinead (Sinéad) na hainmneacha eile.
With our #StormNames being announced at midnight on Tuesday, what Irish girls names would you like included this year?
— Met Éireann (@MetEireann) 9 Meán Fómhair 2018
Thug daoine ar na meáin shóisialta le fios gur bhreá leo go dtabharfaí ainm Gaeilge ar stoirm ar mhaithe le deacrachtaí foghraíochta a chruthú do lucht na haimsire sa Bhreatain, ach dúirt Evelyn Cusack le Tuairisc.ie go ndéantar iarracht i gcónaí ainmneacha a roghnú ar furasta do dhaoine ó thíortha eile iad a fhoghrú.
Has to be Siobhán just for the fun we’ll have listening to the English forecasters trying to pronounce it ?
— Andrew Maddy (@andrewmaddy) 9 Meán Fómhair 2018
Seo an ceathrú bliain ag Met Éireann liosta ainmneacha do stoirmeacha a chur le chéile i gcomhpháirt le hOifig Met na Breataine.
In 2015, reáchtáil an dá oifig feachtas ar na meáin shóisialta chun moltaí á fháil ón phobal d’ainmneacha stoirmeacha. Mhol daoine thall agus abhus breis agus 10,000 ainm an tráth sin agus táthar ag tarraingt ar an bhunachar ainmneacha sin ó shin.
De réir mar a thagann stoirmeacha chun cinn, ainmnítear iad de réir na n-ainmneacha ar liosta na n-oifigí meitéareolaíochta ag tosú le hainm a thosaíonn le ‘A’. An chéad stoirm mhór eile a thiocfaidh an bealach i mbliana ainm fireann a thosaíonn le ‘A’ a thabharfar uirthi agus ainm baineann a thosaíonn le ‘B’ a thabharfar ar an chéad cheann eile ina dhiaidh sin.
Bronnann Met Éirinn agus Oifig Met na Breataine ainm ar aon stoirm a mheastar a d’fhéadfadh a rian á fhágáil ar thalamh, nó ar ghaotha móra a n-eisítear foláireamh stádas ‘oráiste’ nó ‘dearg’ ina dtaobh.
I measc na n-ainmneacha Gaeilge a tugadh ar stoirmeacha le tamall de bhlianta anuas, bhí Oisín agus Fionn agus bhí leaganacha gallda d’ainmneacha Gaeilge i gceist chomh maith – Maeve agus Clodagh.
Fógrófar liosta iomlán ainmneacha na stoirmeacha do 2018-2019 anocht ar bhuille an mheán oíche.
Tash
Cé chomh sean is atá an fótagraif sin? Féach ar an gcomhartha stad bus – níor chonac ceann mar sin le breis is scór bliain, dearfainn!