Stádas dearg i bhfeidhm maidir le loscadh sléibhe agus an dara teocht is airde in Éirinn riamh á tuar

Deir an Roinn Talmhaíochta go bhféadfadh spréach ar bith tús a chur le loscadh sléibhe a scaipfeadh go tapa agus a bheadh deacair le ceansú

Stádas dearg i bhfeidhm maidir le loscadh sléibhe agus an dara teocht is airde in Éirinn riamh á tuar

Tá foláireamh stádas dearg maidir le loscadh foraoise eisithe ag an Roinn Talmhaíochta agus tonn teasa i ndán don tír as seo go ceann roinnt laethanta.

Rud annamh a leithéid d’fholáireamh a bheith i bhfeidhm in Éirinn, a dúradh i ráiteas a chuir an Roinn amach tráthnóna.

Faoin stádas dearg, an stádas is airde dá bhfuil ann, d’fhéadfadh spréach ar bith, a dúradh, tús a chur le loscadh sléibhe a scaipfeadh go tapa agus a bheadh deacair le ceansú. Ba mhó an baol, a dúradh i ráiteas na Roinne, in áiteanna a bhfuil aiteann agus fraoch, mar atá i go leor ceantair Ghaeltachta.

Tréimhse fhíor-eisceachtúil a bhí ann ó thaobh líon na dtinte sléibhe an samhradh seo caite.

I ngnáthbhliain, tharlódh tuairim is 200 tine agus d’fhéadfadh go scriosfaí timpeall 300ha sna tinte sin. Sa chéad 10 lá de mhí na Bealtaine 2017, tharla 85 tine shléibhe a rinne damáiste do 1,700ha d’fhoraoiseacha Coillte. Tharla an tine ba mhó agus ba dhainséaraí acu ar fad ar an gClochbhaile i gConamara.

D’imigh an tine ar an gClochbhaile ó smacht sa Bhealtaine agus thóg sé beagnach seachtain ar na seirbhísí éigeandála, dhá héileacaptar ina measc, an tine a mhúchadh. Scriosadh os cionn 1,500ha den choill i gceantar Mhaigh Cuilinn agus spréadh na mílte lítear uisce i gcaitheamh na seachtaine.

Dódh 2,000ha de thalamh portaigh freisin le linn na tine, an tine is mó dá leithéid i stair an stáit.

Moladh inniu d’úinéirí foraoise pleananna do chosc dóiteáin a chur i bhfeidhm agus a bheith ullamh do thinte timpeall ar thithe agus moladh d’fheirmeoirí a bheith cúramach agus innealra á úsáid acu i bhféarghoirt.

Tá ráite ag Met Éireann go bhféadfadh go bhfeicfear an dara teocht is airde riamh in Éirinn roimh dheireadh na seachtaine. De réir na dtaifead, ba i gCill Chainnigh in 1887 a bhí an teocht is airde riamh in Éirinn, 33.3 céim Celsius.

Bhí an teocht chomh hard le 29 céim Celsius tráthnóna agus meastar gur níos airde fós a bheidh sí amárach.

 

Léigh tuilleadh sa rannóg seo 'Nuacht'

Fág freagra ar 'Stádas dearg i bhfeidhm maidir le loscadh sléibhe agus an dara teocht is airde in Éirinn riamh á tuar'

I mBéal an Phobail