Rún ag éileamh sos cogaidh láithreach in Gaza rite ag comhairle slándála na Náisiún Aontaithe den chéad uair

Tá glactha den chéad uair ag comhairle slándála na Náisiún Aontaithe le rún ag éileamh sos cogaidh láithreach in Gaza.

Ba é seo an ceathrú hiarracht dóthain tacaíochta a fháil d’éileamh ar shos cogaidh. Roimhe seo bhain Stáit Aontaithe Mheiriceá leas as a veto chun stop a chur leis an éileamh ach staon siad ó vótáil an geábh seo.

Bhain an Rúis agus an tSín leas as a veto roimhe seo chomh maith.

Vótáil 14 ball den chomhairle slándála ar son an rúin a mhol an Mhósaimbíc.

Níor éirigh le leasú ar an téacs a mhol an Rúis a bhí ag iarraidh go gcuirfí sos cogaidh inmharthana ‘seasmhach’ in áit  ‘sos cogaidh inmharthana buan’ mar a bhí sa rún.

De réir an rúin, éilítear “sos cogaidh láithreach do mhí Ramadan a léireodh gach páirtí meas air agus arb é sos cogaidh seasmhach inmharthana an toradh a bheidh air”.

Deirtear sa rún go bhfuil “géarghá” le dlús a chur le scaoileadh tuilleadh le sruth na daonchabhrach agus a chinntiú go dtabharfar cosaint do mhuintir an stráice go léir.

Éilítear sa rún chomh maith go scaoilfí saor gan aon choinníollacha na gialla atá fós á gcoimeád agus go dtiocfaí chun fóirithinte orthu láithreach le pé cuidiú leighis nó eile atá ag teastáil uathu a thabhairt dóibh.

Dúirt ambasadóir Stáit Aontaithe Mheiriceá chun na Náisiún Aontaithe, Linda Thomas-Greenfield, go mbeadh sos cogaidh ann “roinnt míonna ó shin” dá mbeadh na gialla scaoilte saor ag Hamas.

Tá iarrtha ag Ard-Rúnaí na Náisiún Aontaithe Antonio Guterres ar Iosrael cabhair dhaonnúil a ligint isteach i dtuaisceart Gaza, mar a bhfuil baol gorta,  agus gan dul ar aghaidh leis an ionsaí atá beartaithe ar chathair Rafah.

Tá deacrachtaí móra ag grúpaí fóirithinte idirnáisiúnta cúnamh a thabhairt isteach chuig Gaza ó thosaigh an choimhlint ansin agus tá rabhadh tugtha acu go bhfuil páistí ag fáil bháis leis an ocras mar nach féidir teacht i gcabhair orthu.