Ní chuirfidh fógra Craughwell ‘isteach ná amach’ ar chinneadh Uí Chéidigh faoi rás an Árais

Beidh cúpla seachtain eile ann sula ndéanfaidh an Seanadóir Pádraig Ó Céidigh a chinneadh faoina bheith ina iarrthóir do thoghchán na huachtaránachta.

Níl aon iarratas déanta go fóill ag an Seanadóir Ó Céidigh ar thacaíocht ó aon Chomhairle Contae maidir le hainmniúchán don toghchán agus deir sé gur chóir do na húdaráis áitiúla fanacht go dtí Meán Fómhair féachaint cé hiad na hiarrthóirí ar fad a bheidh ag lorg tacaíochta uathu.

Tá an chéad deis á tabhairt ag Comhairle Cathrach agus Contae Phort Láirge d’iarrthóirí uachtaránachta cur i láthair a dhéanamh agus ainmniúchán á lorg don toghchán uachtaránachta ag cruinniú de chuid na Comhairle a bheidh ar siúl ar an 31 Iúil.

D’fhógair an Seanadóir neamhspleách Gerard Craughwell inné nach bhfuil sé ar intinn aige seasamh don toghchán.

Dúirt Pádraig Ó Céidigh nach gcuirfidh an fógra sin isteach ná amach ar a chinneadh féin. Mhol sé an Seanadóir Craughwell as tús a chur le “díospóireacht thábhachtach” faoi cé acu ar cheart nó nár cheart toghchán a bheith ann don uachtaránacht.

Tá an Seanadóir neamhspleách agus fiontraí as an Spidéal i nGaeltacht Chonamara ar dhuine de na daoine atá á lua leis an toghchán uachtaránachta. I measc

na ndaoine eile atá á lua leis an toghchán, tá an Seanadóir Joan Freeman, an t-ealaíontóir Kevin Sharkey, an fear gnó Gavin Duffy agus an tráchtaire Noel Whelan.

Tá Fianna Fáil agus Fine Gael araon ag tacú leis an Uachtarán Micheál D. Ó hUigínn a bhfuil an dara téarma ag teastáil uaidh, ach tá sé i gceist ag Sinn Féin iarrthóir a roghnú chun dúshlán an uachtaráin a thabhairt.

Tá polaiteoir Gaeltachta eile á lua le hainmniúchán Shinn Féin, an Feisire Eorpach as Gaeltacht Chorcaí, Liadh Ní Riada. Níl sé curtha as an áireamh ag Ní Riada go seasfadh sí sa toghchán.