Ní campas dátheangach é campas Ollscoil na hÉireann, Gaillimh, dar le huachtarán na hollscoile, Jim Browne, in ainneoin an mana “campas dátheangach” a bheith luaite ar shuíomh idirlín na hollscoile agus ábhar poiblíochta eile.
Agus ceist riachtanas na Gaeilge do phost an uachtaráin san ollscoil á plé i dTithe an Oireachtais inné, dúirt Browne, a bheidh ag éirí as cúram na huachtaránachta go luath nach ‘campas dátheangach’ atá in OÉ, Gaillimh “chun an fhírinne a insint” ach gur “aspiration” atá ann an stádas sin a bhaint amach. “Sin í an fhírinne,” a dúirt sé.
Baineadh stangadh as Cathaoirleach an Choiste, Catherine Connolly, ar Teachta Dála do Ghaillimh Thiar agus céimí de chuid na hollscoile í, nuair a chuala sí an méid sin.
“Gabh mo leithscéal, ní campas dátheangach é? Tá sé sin thuas ar an suíomh idirlín nach bhfuil?” a d’fhiafraigh Connolly den uachtarán.
Dúirt Browne go bhfuil lucht na hollscoile “ag déanamh [a] ndíchill” le go mbeadh an campas dátheangach.
“Tá muid ag cur seirbhísí ar fáil i nGaeilge, tá sé sin fíor. Ach níl Gaeilge ag gach aon duine sa champas,” a dúirt sé.
Maítear ar shuíomh aonteangach na hollscoile go bhfuil áit faoi leith ag an nGaeilge san ollscoil agus go bhfuil “timpeallacht dhátheangach” le fáil ar champas na hollscoile “áit a n-úsáidtear an Ghaeilge go rialta in imeachtaí acadúla agus sóisialta an champais”.
Maítear go bhfuil an scéim teanga a tugadh isteach faoi Acht na dTeangacha Oifgiúla 2003 “lárnach i gcruthú campas eiseamláireach dátheangach” in Ollscoil na hÉireann, Gaillimh. Deirtear ar an suíomh go bhfuil sé mar aidhm ag an scéim teanga soláthar na seirbhísí Gaeilge i réimsí acadúla agus riaracháin na hollscoile a leathnú chomh maith le seirbhísí ginearálta eile.
Dúirt Browne le linn an chruinnithe chéanna go bhfuil sé “an-deacair” cúrsaí ollscoile a theagasctar i nGaeilge, ach nach cúrsaí sa Ghaeilge iad, a chur ar fáil mar nach bhfuil an fhoireann, na hacmhainní ná na téacsleabhair chuige sin ar fáil.
Dúirt sé freisin nach mbíonn mórán éilimh ar chúrsaí a chuirtear ar fáil “trí mheán na Gaeilge” agus gur “fadhb mhór” í sin.
Chuir an Teachta Dála do Ghaillimh Thiar Éamon Ó Cuív i leith ionadaithe na hollscoile a bhí ag an gcruinniú inné gur “loic siad” i leith na gcúrsaí Gaeilge agus gur “léir go bhfuil tarraingt siar ar chúrsaí nua a chur ar fáil trí mheán na Gaeilge” san ollscoil.
