Is ionann adharca a chur ar dhuine agus a dhéanamh amach gur drochdhuine é, gur diabhal é.
Fear na n-adharc a thugtar ar an diabhal. Bíonn fear na n-adharc siúlach a deirtear – bíonn sé gnóthach i gcónaí.
Bíonn daoine in adharca a chéile scaití—ag sárú ar a chéile, ag gleo, ag achrann, in árach a chéile.
Is iomaí cineál adhairce ann:
Adharc fiaigh, adharc cheoigh, adharc seilide, adharc dhúigh, adharc phúdair, adharc diallaite, adharc ancaire, adharc inneonach, adharc ghluaisteáin (bonnán), adharc seilge, scian cois adhairce.
Bíonn fianna ag adharcáil a chéile — ag troid leis na hadharca.
Bhíodh miosúr ann ar a dtugtaí adharc —thógfadh sé trí adharc le dhá ghloine shiopa a dhéanamh.
Seo leaganacha eile cainte a bhfuil an focal adharc iontu:
Tharraing sé isteach a chuid adharc — lig sé faoi.
Gaoth a shíobfadh na hadharca den eallach.
Adharca a bhíos ar chaoirigh agus ar bheithígh. Nuair a bhíos na hadharca iompaithe chun a chéile ar dhéanamh leathfháinne, adharca cúbacha iad. Adharca croma nó adharca scartha cineálacha eile.
Bíonn gunnaí adhairce ar gach aon taobh den tsrón. Goiríní adhairce a thugtar in áiteacha orthu.
In adharc gabhair – i gcruachás, idir dhá thine Bhealtaine, i ngalar na gcás.
Ba mhór i gceist bó na leath-adhairce san amhrán.
Rachadh sé isteach in adharc gabhair – le faitíos.
Dá shine an gabhar is ea is crua a adharc – dá shine an duine is amhlaidh is láidre a thréithe.
Chomh crua le hadharc pocaide.
Bainne cíche circe, á bhleán in adharc muice, agus cleite cait á shuaitheadh – raiméis de leigheas a thug dochtúir don té a bhí ag ligean air a bheith tinn.
Téann an bainne in adharca na mbó sa ngeimhreadh – ní bhíonn siad ag tál an oiread bainne.
Ar adharca a bheirtear ar na ba is ar theanga ar na mná.
Bíonn adharca fada ar na ba thar lear.
‘Tá beirt agaibh ann,’ mar a deir an gabhar lena adharca.
Pádraig O'hEipicín
Is minic a mbionn fear céile agus máthair a chéile, in adharc a chéile