An mbeidh Boris Johnson agus Micheál Martin i gceannas ar a gcuid páirtithe an t-am seo an chéad bhliain eile? Ceist í sin atá ag éirí níos práinní in aghaidh an lae.
Tá a fhios ag fia agus ag fiolar go bhfuil díorma i bhFianna Fáil atá go nimhe neanta in aghaidh Mhicheál Martin a bheith ina cheannaire orthu. Níl siad ach ag fanacht le deis a fháil leis an scian a chur go feirc ina dhroim.
Is measa ná sin an chontúirt atá ar Bhoris Johnson. Tá a lucht leanúna ag cailleadh muiníne as siúd freisin.
Ceapann go leor acu nach féidir é a thrust. Ní raibh leisce ar bith ar Uachtarán na Fraince Emmanuel Macron, a rá gur bobarún, cábóg, daoiste agus leadhb é. Níos measa ná sin aríst thug sé cloigneachán air.
‘Sleaze’ an focal Béarla is mó a chaitear ina bhéal.
Rinne sé a aimhleas nuair a d’fhéach sé le Owen Patterson a chosaint. Bhí Patterson ag déanamh neart airgid ar obair phríobháideach nuair ba chóir dó a bheith ag freastal ar lucht a thoghcheantair.
Sheas Johnson leis ar dtús ach b’éigean dó géilleadh sa deireadh agus glacadh le rún ó Pháirtí an Lucht Oibre go bhféachfaí le deireadh a chur le nós an dá phost.
Nós é sin a bhí á chleachtadh ag Sir Geoffrey Cox freisin. Bhí an fear seo ina Ard-Aighne ag na Coimeádaigh tráth. Shaothraigh sé os cionn £800,000 ag cur comhairle dlí ar rialtas Oileáin Bhriotanacha na Maighdean i Muir Chairb.
Thug Johnson postanna breátha do chairde eile a raibh brabach aige féin orthu. Sampla amháin ba ea an tsaoire a fuair sé in aisce i ndeisceart na Spáinne ó Zac Goldsmith.
Agus cár fhág muid an scéal faoin mbean gnó as Meiriceá, Jennifer Arcuri, a mbíodh Johnson ag seoladh na ngamhna sa bhfásach léi? Cuireadh ina leith gur thug sé buntáistí gnó di le linn dó a bheith ina Mhéara ar Londain.
Tá sé de mhí-ádh ar Johnson anois go bhfuil dreamanna éagsúla sa bPáirtí Coimeádach ag iompú ina aghaidh in éineacht. Bhí eite dheis an pháirtí an-sásta leis an gcaoi ar dhéileáil sé leis an mBreatimeacht ach gheall sé gur ísliú cánach agus smacht ar eisimircigh an toradh a bheith air. Ardú cánach atá tarlaithe ó shin.
Cinnte dearfa ní fear é Johnson a chomhlíonann a chuid gealltanas. Choinnigh cuid mhaith feisirí coimeádacha i dtuaisceart na Breataine a gcuid suíochán nuair a gheall Johnson go n-ardódh sé eacnamaíocht an tuaiscirt leis an réigiún sin thabhairt níos gaire do rathúnas an deiscirt. ‘Levelling up,’ a thugann sé air.
Aríst is é a mhalairt atá ag tarlú. Féach an maolú atá déanta aige ar an bplean a bhí ann leis an gcóras iarnróid ó thuaidh a fheabhsú.
Ní bhíonn trua ná trócaire i bPáirtí Coimeádach na Breataine nuair a shocraíonn siad fáil réidh le ceannaire dá gcuid. Rinne siad le Maggie Thatcher é cé gur bhuaigh sí trí olltoghchán.
Thug Winston Churchill comhairle uair amháin faoin gcaoi ar cheart don Pháirtí Coimeádach déileáil leis an té a bheadh in Phríomh-Aire acu:
“Má bhaintear tuisle as ba cheart lámh chúnta a thabhairt dó,” a dúirt sé, “má dhéanann sé dearmad ba cheart é a chlúdach, má thiteann sé ina chodladh níor cheart é a dhúiseacht de phlimp, mura bhfuil aon mhaith leis ba cheart bóthar a thabhairt dó.”
Sin é a rinne siad le Winston Churchill féin i 1945, cé gurbh é laoch mór an Dara Cogadh Domhanda acu é roimhe sin.
An bhfuil i bhfad eile sa gcathaoir i ndán do Mhicheál Mánla Martin? B’fhéidir go bhfágfaí ansin é go mbeidh a thréimhse mar Thaoiseach thart.
Beidh Boris Breá Johnson imithe roimhe déarfainn.
Pádraig O'hEipicín
An bhfuil Turais .ie ar son Lucht an Ghinmhillte. ???.
Cian Ó Nialáin
Cad é an ráiteas “má bhaintear tuisle as…” as Béarla?
Seosamh Ó Cuaig
Fall, stumble, trip i mBéarla.
Seosamh Ó Beirgin
Tugann scriobhneoir an ailt seo le fios gur ruaigeadh Winston Churchill as a phost mar cheannaire ar an bPáirtí Coimeádach i 1945 tar éis an Dara Cogadh Domhanda. Níl sé sin fíor ar chor ar bith. Is fíor gur chaill na Coimeádaigh an olltoghchán a bhí ann i samhradh na bliana 1945 ach lean Churchill ar aghaidh mar cheannaire ar an bpáirtí agus mar cheannaire an fhreasúra go dtí 1951, nuair a toghadh arís mar phríomh-aire é.
Seosamh Ó Cuaig
Go raibh míle maith agat, a Sheosaimh faoi mé a cheartú.
An Teanga Bheo
Anois is fear pósta é le dhá leanabh bheaga in uimhir a 10
agus is minic ceannaire nua acu de réir a chéile
Seán Mag Leannáin
Boris Breá Johnson imithe roimh Mhicheál Mánla Martin? Beidh le feiceáil.