B’é Cathal Póirtéir fear na ceisteanna arís ag ‘Buail leis an Údar’ an tseachtain seo agus mheall sé seanchas agus saíocht as Liam Mac Cóil, duine a raibh dúil aige sa scríbhneoireacht, sula raibh an léamh féin aige, is cosúil! Rinne sé iarracht bheith beo (ar éigean) ar an scríbhneoireacht; rud atá sách deacair i mórtheanga ach atá dodhéanta amach is amach i mionteanga. Mar sin féin, chloígh sé leis agus sheas sé an fód. Oidí a spreag chun pinn é i dtosach báire. Bhí cúnamh aige óna bhean freisin, a shaothraigh agus é féin ag obair i bpost roinnte. Fearacht go leor scríbhneoirí, duine é ar gá dó bheith scríobh agus nach raibh aon dul as aige. Is duine é, leis, a bhaineann sásamh as an dréacht athscríofa snoite.
Léigh sé sleachta as an tsraith stairiúil a ghabhann le ré Aodh Mhóir Uí Néill, An Litir agus I dTír Strainséartha, mar aon le sliocht as an leabhar faoin gcumadóir Éireannach Stanford, An Chláirseach agus an Choróin.
Is maith ann na hócáidí seo a thugann deis do léitheoirí bualadh leis na daoine laistiar den leabhar; fiú má tá Liam Mac Cóil ar aon fhocal le Barthes – go bhfuil an t-údar marbh- ‘l’auteur est mort’ – ní thig tátal faoin duine a bhaint as an méid a scríobhann sé in úrscéal. Fós féin, tá tairbhe le baint as éisteacht le seanchas faoi bheith i mbun scríobhneoireachta agus taighde.
Is maith ann IMRAM a chuireann deiseanna mar seo ar fáil, agus tá sraith imeachtaí ar siúl níos déanaí an mhí seo: ina measc teacht le chéile eile mar a mbeidh leithéidí Liam ag plé úrscéalta stairiúla sa Siopa Leabhar ar an 18 Bealtaine.
Tá breis sonraí ar fáil ar shuíomh IMRAM.
Fág freagra ar 'LÉIRMHEAS: Buail leis an údar….Liam Mac Cóil'