Leabhar iontach greannmhar, cliste agus dea-scríofa

Thart ar leathbhealach tríd an leabhar seo, tá pictiúr de bhuachaillín beag darb ainm Nollaig de Róiste, é ag caitheamh hata olla, pitseámaí Pooh Bear agus slipéir bhoga i gcruth coiníní. Ba é sin ceann d’uasphointí an leabhair agus an scéil domsa – ná habair nach bhfuil aithne againn ar fad ar dhuine éigin, páiste nó eile, a shuíonn síos don oíche (nó don lá) i bhfeisteas den chineál chéanna,

Is leabhar iontach greannmhar, cliste agus dea-scríofa é seo, agus bhain mé an-sult go deo as. Tá sé aistrithe ag an údar Sadhbh Devlin – an chéad leabhar atá aistrithe aici, a deirtear linn ar chúl an leabhair, agus tá jab iontach déanta aici leis an leagan Gaeilge. Tá sé go hiomlán Gaelach ó thús deireadh: ó ainmneacha na gcarachtar go dtí an comhrá eatarthu.

Ó thaobh an phlota de, is é bun agus barr an scéil go bhfuil cailín óg, Áine, thar a bheith míshásta lena cuid gruaige – agus arís, an bhfuil éinne amuigh ansin nár mhothaigh mar sin ag pointe éigin ina saol? Ar aon nós, tá sí ag iarraidh bearradh gruaige a fháil – nó sa chás seo, a thabhairt di féin – ionas go mbeidh cuma níos slachtmhaire uirthi agus go mbeidh a saol deich míle uair níos fearr.

Bhuel, ní mhillfidh mé an scéal oraibh, ach is féidir liom a rá go cinnte go mbeidh páistí agus daoine fásta araon an-tógtha leis an scéilín seo faoi Áine, faoina cairde Íde agus na cailíní eile, agus faoi Nollaig de Róiste úd (an carachtar is fearr liom – is breá liom an chaoi a n-iompaíonn a ról sa scéal ó bheith ar an imeall go bheith i lár an aonaigh!).

Tá go leor spraoi agus greann sa scéal, agus croí mór ina lár. Foilseachán álainn snasta é seo de chuid Futa Fata. Eoin Colfer an t-údar, agus Richard Watson a mhaisigh. Tá na léaráidí iontach – lán le haicsean, beocht agus dathanna geala. Tá rud éigin craiceáilte ar gach leathanach! Is breá liom an chaoi a bhfuil cothromaíocht idir na pictiúir agus an téacs. Agus ag caint ar théacs, tá níos mó scríbhneoireachta sa leabhairín beag seo ná mar a bheifeá ag súil leis – agus is maith an rud é go bhfuil an téagar sin ann, chomh maith leis an luas agus an spraoi síos tríd. Rud beag eile a thaitníonn go mór le léitheoirí óga ná an dá phictiúr laistigh den chlúdach – caithfidh siad na difríochtaí a aimsiú! Tá caighdeán an foilseacháin seo thar barr – slachtmhar snasta agus bog.

Molaim go mór Gruaig Áine – scéal spleodrach greannmhar a chuirfidh meangadh ar éinne, beag nó mór.