Tá an gradam do ‘Leabhar Gaeilge na Bliana’ buaite ag Cnámh le Eoghan Mac Giolla Bhríde ag na mórghradaim litríochta, An Post Irish Book Awards, a fógraíodh i mBaile Átha Cliath anocht.
Tá an cnuasach gearrscéalta Cnámh (Éabhlóid) ar an gcéad mhórshaothar ó pheann Mhic Giolla Bríde, scríbhneoir, foilsitheoir agus aisteoir as Gaoth Dobhair i nGaeltacht Dhún na nGall. Dúirt sé Eoghan Mac Giolla Bhríde go raibh sé “iontach tógtha” faoin duais agus go raibh sé sásta go háirithe gur éirigh leis an beart a dhéanamh le cnuasach gearrscéalta.
“Is deas an smaoineamh é go rachaidh an scéala amach faoin leabhar bheag seo anois, a chuir mé oiread de mo chroí isteach ann agus go bhfaighidh sé baile i measc léitheorí nach gcluinfeadh faoi gan an t-ardán seo a bheith aige. Go raibh míle maith agaibh.”
Bhí Cnámh i measc na saothair a roghnaigh Tuairisc.ie mar Leabhair na Bliana 2019.
Dúirt ár léirmheastóir, Dónall Ó Braonáin gur “geall le radhairc scannánaíochta an chuid is cumasaí den scagadh a dhéantar ar charachtair agus suímh” i Cnámh.
“Cuirtear meascán stíleanna inár láthair freisin, cuid de na scéalta sa gcéad phearsa agus cuid eile i bhfuarchúis thuairisciúil an tríú pearsa ach tá an dea-scríbhneoireacht iontu ar fad,” a dúirt sé.
Agus an cnuasach á léirmheas ar an iris Comhar aige mhol Antain Mac Lochlainn na “abairtí ealaíonta seolta” agus “friotal saibhir” ann chomh maith le “dáimh” Mhic Giolla Bhríde “leis na daoine lochtacha leochaileacha a chuireann sé inár láthair”.
“Ní ghéilltear i scéal ar bith don chasadh chliste ná don deireadh drámatúil. Fágann na carachtair an stáitse agus téann an saol ar aghaidh. Faoin léitheoir atá sé a rogha brí a bhaint as,” a dúirt Antain Mac Lochlainn.
Sé leabhar Gaeilge a bhí san iomaíocht ag Irish Book Awards na bliana seo.
Seo an tríú bliain rannóg ar leith don Ghaeilge a bheith ag na gradaim agus í urraithe ag LoveLeabharGaeilge, feachtas a chuireann leabhair nuafhoilsithe chun cinn.
Is iad na leabhair eile a ainmníodh do dhuais na bliana seo ná Múscail a Ghiorria (Arlen House) le Eithne Ní Ghallchobhair; An Diabhal Déanta (Cló Iar-Chonnacht) le Joe Steve Ó Neachtain; Cur i gCéill le Celia de Fréine (LeabhairCOMHAR); Bealach na Spáinneach le Liam Mac Cóil (Leabhar Breac) agus Éadaoin le Diarmuid Johnson (Leabhar Breac).
Mícheál Ó Ruairc
Ardfhear, a Eoghain. Tréaslaím do mhórghradam leat. É tuillte go maith agat freisin.
Pádraig Rua Ó Baoill
Comhghairdeas leat a Eoghain. Beir Bua go deo!