Bronnfar Gradam Gnó an Dochtúir Ó Loingsigh 2018 ar Mhicheál Ó Lionáird, iarphríomhoide Choláiste Ghobnatan, Dé Sathairn beag seo san Ionad Cultúrtha i mBaile Bhuirne i Múscraí.
Is duais bhliantúil í seo a bhronntar ar dhuine nó ar dhream a léiríonn ‘spiorad fiontraíochta, meon dóchasach, agus meas cultúrtha Uí Loingsigh’.
Ag labhairt dó le Tuairisc.ie, dúirt Mícheál Ó Lionáird, a bhí ina phríomhoide ar Choláiste Ghobnatan ó 1957 go 1989, gur “onóir mhór” dó an t-aitheantas seo a fháil, go háirithe agus an oiread scéalta cloiste aige i gcaitheamh a shaoil faoi éachtaí Uí Loingsigh.
Gníomhaí cultúrtha agus sóisialta ab ea an Dochtúir Domhnall Ó Loingsigh, a bhásaigh ag tús an chéid seo caite, agus a bhfuil an-mheas air i measc mhuintir Mhúscraí go fóill.
Throid Ó Loingsigh sa Chogadh Ostra-Ungárach agus chaith sé seal i Meiriceá ar thóir an óir sular bhain sé céim sa leigheas amach i gColáiste na hOllscoile, Corcaigh.
B’fhear mór cultúir é freisin a raibh d’fhís aige do Bhaile Bhuirne go gcaomhnófaí saibhreas oidhreachta an cheantair.
Dúirt Réidín Lynch, garneacht leis an Loingseach, ar ball í de Choiste Chomóradh an Dochtúir Ó Loingsigh, gur thug Mícheál Ó Lionáird leis “príomhthréithe an dochtúra” ina chuid oibre mar “oideachasóir” agus thug sí suntas don obair a rinne sé chun “fostaíocht a thabhairt chuig an gceantar” agus don mheas a léirigh sé ar chultúr na Gaeltachta.
Ba scoil aon seomra í Scoil Ghobnatan nuair a thosaigh Mícheál Ó Lionáird ag obair inti.
Bhí ról lárnach ag Ó Lionáird, athair dáréag clainne, ina measc an t-amhránaí aitheanta Iarla Ó Lionáird agus an craoltóir aitheanta Páidí Ó Lionáird, i bhforbairt na scoile agus sna hiarrachtaí a rinneadh chun deiseanna fostaíochta breise a ghnóthú dá scoláirí.
Chinntigh sé freisin go raibh ceangal ag scoláirí le cultúr na háite agus fáilte á cur aige roimh cheoltóirí, scríbhneoirí agus ealaíontóirí chun ranganna ceoil, sceitsí agus agallaimh bheirte a chur ar fáil dá scoláirí.
Dúirt Réidín Lynch gur léir gur sheas Mícheál “le saol agus éachtaí an Dochtúra Ó Loingsigh sa cheantar”, agus é i measc na ndaoine a mhol go n-athainmneofaí an lárionad cultúrtha in onóir an dochtúra.
Seo í an cúigiú bliain a bhfuil an gradam seo á bhronnadh i gcuimhne ar an Dochtúir Ó Loingsigh agus comóradh á dhéanamh ar a shaol agus a shaothar.
In 2015 a bronnadh an chéad ghradam in ómós don Dochtúir Ó Loingsigh, agus ba ar mhac le Mícheál Ó Lionáird, Peadar agus ar a chomhlacht Folláin Teo a bronnadh é.
Mar chuid den teacht le chéile, beidh cainteanna á dtabhairt ag an Ollamh Patrick O’Shea, Uachtarán Choláiste na hOllscoile Corcaigh agus ag an Ollamh le Stair Dáibhí Ó Cróinín ó Ollscoil na hÉireann, Gaillimh.
Cuirfear tús leis an ócáid ag a 2.30in in Ionad Cultúrtha Bhaile Bhuirne agus beidh fáilte roimh chách.
Fág freagra ar 'Gradam Gnó an Dochtúir Ó Loingsigh á bhronnadh ar Mhícheál Ó Lionáird'