Foireann na hÉireann don chluiche in aghaidh na Fraince ainmnithe ag Schmidt

Tá foireann rugbaí na hÉireann don chluiche in aghaidh na Fraince ar an Satharn ainmnithe ag Joe Schmidt. Tá trí athrú déanta ag Schmidt ar an bhfoireann a d’imir an Domhnach seo caite in aghaidh na Breataine Bige agus Seán O’Brien, Dave Kearney agus Rob Kearney tagtha isteach in áit Tommy O’Donnell, Keith Earls agus Simon Zebo.

Bhí moill ar fhógairt na foirne agus Schmidt ag iarraidh gach deis a thabhairt do Zebo agus Earls teacht chucu féin, ach, cé go raibh siad i mbun traenála inniu, níor mheas an bainisteoir go raibh siad sách aclaí fós.

Bhí ar Earls an pháirc a fhágáil roimh dheireadh an chluiche in aghaidh na Breataine Bige agus gortú cloiginn ag cur as dó agus is gortú glúine atá ag cur as do Zebo. Bhí amhras ann chomh maith faoi Jonathan Sexton ach tá seisean tagtha chuige féin.

Cé go raibh an chlibirt faoi bhrú sa chluiche in aghaidh na Breataine Bige, sheas Schmidt leis an líne thosaigh de Jack McGrath, Rory Best agus Nathan White. Níl áit i measc na n-ionadaithe fiú ag Mike Ross agus Cian Healy, atá ainmnithe ar fhoireann Chúige Laighean dá gcluiche in aghaidh Zebre an deireadh seachtaine seo.

Tá Eoin Reddan, Fergus McFadden agus Richard Strauss tagtha isteach i measc na n-ionadaithe, rud a chiallaíonn nach bhfuil aon áit sa scuad do Sean Cronin, Kieran Marmion nó Rhys Ruddock.

Tá foireann na Fraince ainmnithe cheana féin ag Guy Noves agus ualach athruithe déanta aige. Cé gur bhuaigh na Francaigh ar an Iodáil Dé Sathairn seo caite ba bhocht an taispeántas a thug siad uathu agus tá sé athrú déanta ar an bhfoireann. Tá an cliathánaí Teddy Thomas agus an bheirt phrapa, Uni Antonio agus Jefferson Poiriot, i measc na n-imreoirí atá tagtha isteach.

Foireann na hÉireann

15. Rob Kearney

14. Andrew Trimble

13. Jared Payne              

12. Robbie Henshaw                    

11. Dave Kearney                               

10. Jonathan Sexton             

9. Conor Murray

1. Jack McGrath

2. Rory Best                                                        

3. Nathan White                                                     

4. Mike McCarthy                                      

5. Devin Toner                                             

6. CJ Stander

7. Sean O’Brien                  

8. Jamie Heaslip                                              

Ionadaithe

16. Richard Strauss                             

17. James Cronin                                      

18. Tadhg Furlong                                     

19. Donnacha Ryan                                               

20. Tommy O’Donnell                                                   

21. Eoin Reddan                               

22. Ian Madigan

23. Fergus McFadden