Cluichí ceannais na mBan sna cúigí le craoladh ar Youtube ag TG4

Craolfar beo cluichí ceannais na gcúigí uile i gCraobh Shinsir Peile na mBan den chéad uair an mhí seo chugainn agus é fógartha ag TG4 agus Cumann Pheil na mBan go mbeidh na cluichí á gcraoladh acu ar YouTube.

I measc na bhfoirne a bheidh le feiceáil agus na cluichí ceannais á n-imirt sna chéad chúpla seachtain de mhí Iúil, beidh Dún na nGall, Gaillimh, Maigh Eo, Ciarraí agus Port Láirge.

Cuirfear tús leis an mbeochraoladh an Domhnach seo nuair a imreofar cluiche ceannais Uladh idir mná Thír Chonaill agus mná Mhuineacháin. An tráthnóna céanna, tabharfaidh Gaillimh aghaidh ar a gcomharsana, Maigh Eo, i gcluiche ceannais Chonnacht i gCaisleán an Bharraigh.

An Satharn ina dhiaidh sin, ar an 8 Iúil, beidh Port Láirge ag iarraidh Craobh na Mumhan a thabhairt leo den chéad uair ó 2002 agus iad i gcoinne Chiarraí. Lá arna mhárach, Dé Domhnaigh an 9 Iúil, imreoidh Baile Átha Cliath agus an Iarmhí i gcluiche ceannais Laighean.

Chuir Ard-Stiúrthóir TG4, Alan Esslemont, fáilte roimh an mbeochlúdach.

“Is iomaí forbairt shuntasach déanta againn ar ár gclúdach ar Chraobh TG4 i bPeil na mBan ó thosaigh muid air, seacht mbliana déag ó shin agus is deas linn an ceann is deireanaí seo – beochlúdach ardchaighdeáin ar YouTube ar na Cluichí Ceannais Cúige i ngrád na sinsear. 

“Tabharfaidh na cluichí seo tuairim mhaith don lucht leanta faoina bhfuil amach romhainn sa gCraobh sa Samhradh,” a dúirt Alan Esslemont.

D’fháiltigh Ard-Stiúrthóir an LGFA, Helen O’Rourke, freisin roimh an fhorbairt seo agus mhol TG4 as na cluichí craoibhe seo a chraoladh beo. “Cuirfear suim ar leith sna cluichí seo ina bhfuil ocht bhfoireann chumasacha páirteach. Den chéad uair ó 2003, níl Corcaigh cáilithe do Chluiche Ceannais na Mumhan agus i gcúige Laighean, tá mná Átha Cliath ar thóir an séú craobh as a chéile,” a dúirt Ard-Stiúrthóir an LGFA, Helen O’Rourke.

Ní hé seo an chéad uair ar chraol TG4 cluichí beo ar Youtube agus bhain siad leas as an gcainéal ar líne do chluichí i gCraobh Faoi-21 Peile na hÉireann, i Sraith Peile na mBan agus i Sraith Camógaíochta cheana féin i mbliana