Cé hiad na fir atá san iomaíocht do phost iománaíochta na Gaillimhe?

Mattie Kenny – 7/4

Is fear é Kenny a mbeidh aithne mhaith ag cuid de na himreoirí air tar éis dó dhá bhliain a chaitheamh mar roghnóir ag Anthony Cunningham ar fhoireann na Gaillimhe nuair a shroich siad cluiche ceannais na hÉireann i 2012. D’éirigh sé as an bpost ag deireadh 2013 agus tá sé anois ina bhainisteoir ar fhoireann Chuala i mBaile Átha Cliath. Imreoidh siad i gcluiche ceannais Chúige Laighean an tseachtain seo chugainn tar éis dóibh craobh an chontae a bhuachan i mbliana.

Ní hé seo an chéad uair Kenny a bheith luaite le post na Gaillimhe agus chuir sé a ainm chun tosaigh anuraidh. Rud amháin a bheadh ag dul ina choinne ná go raibh sé páirteach cheana féin ar  fhoireann bhainistíochta ar theip orthu Craobh na hÉireann a bhuachan leis na himreoirí céanna.

Michael Donoghue – 7/4

Fearacht Kenny, bhí Michael Donoghue ar fhoireann bhainistíochta Faoi-21 na Gaillimhe i 2005 nuair a bhuaigh siad Craobh na hÉireann. Bheadh aithne níos fearr air mar an té a bhuaigh Craobh Club na hÉireann faoi dhó le Droichead an Chláirín, mar imreoir i 2001 agus arís mar bhainisteoir i 2011 nuair a bhuaigh siad ar Ghaeil Uí Lochlainn.

Tar éis dó seal a chaitheamh mar bhainisteoir an Turlaigh Mhór i nGaillimh, tá Donoghue mar chuid d’fhoireann bhainistíochta Eamon O’Shea le Tiobraid Árann le cúpla bliain anuas, taithí a a sheasfadh leis agus post na Gaillimhe le líonadh.

Anthony Daly – 10/3

Níor éirigh le Ger Loughnane mórán dul chun cinn a dhéanamh mar bhainisteoir ar Ghaillimh ach b’fhéidir go mbeadh níos mó ratha ar an bhfear a bhí mar chaptaen aige nuair a bhuaigh an Clár Craobh na hÉireann i 1995 agus 1997. Rinne sé an-obair le foireann Bhaile Átha Cliath agus é ina bhainisteoir acusan freisin.

Tá Daly i gceannas ar chóras iománaíochta faoi aois Luimnigh faoi láthair ach seans gur leor an gradam a bhaineann le post na Gaillimhe chun é a mhealladh ar ais chuig grád na sinsear. An t-aon amhras a bheadh ann faoi ná nár éirigh le Baile Átha Cliath faoina cheannas an chéad chéim eile a thabhairt agus Corn Mhic Cárthaigh a bhuachan.

Jeffrey Lynskey – 7/2

Ní raibh jab éasca a bhí ag Jeffrey Lynskey sa chéad bhliain aige mar bhainisteoir ar mhionúir na Gaillimhe agus é mar chomharba Mattie Murphy, fear a raibh sé cinn de Chraobhacha Mionúr na hÉireann buaite aige leis an gcontae. Ní raibh muintir an chontae ag súil le mórán ón bhfoireann i mbliana ach, bliain agus fiche tar éis dó an corn a bhuachan mar imreoir, stiúir Lynskey foireann 2015 chuig Craobh na hÉireann arís.

Mar sin féin, b’fhéidir go bhfuil sé róluath do Lynskey post na sinsear a thógáil agus b’fhearr an rud b’fhéidir dá bhfanfadh sé le foirne faoi aois an chontae go fóill.

Johnny Kelly – 8/1

Fear eile a chuir isteach ar an bpost céanna anuraidh, sular tugadh téarma eile do Cunningham, bhí Kelly ina bhainisteoir ar Phort Omna nuair a bhuaigh siad Craobh na hÉireann i 2009. I mbliana, bhuaigh sé Craobh Uíbh Fhailí agus é i gceannas ar Chúldoire.

Chaith Kelly trí bliana mar bhainisteoir Faoi-21 na Gaillimhe ach d’éirigh sé as i mbliana gan oiread is cluiche buaite ag na Gaillimhigh sa chomórtas. Bhí níos mó ratha ar fhoireann idirmheánach an chontae, iad ag buachan Craobh na hÉireann i mbliana.

Eamon O’Shea – 10/1

Agus é ag obair i nGaillimh agus cónaí air ann, ní haon iontas go bhfuil O’Shea luaite leis an bpost ach gan é ach díreach críochnaithe le Tiobraid Árann, ní dócha go mbeadh suim aige ann. Bhain O’Shea cáil amach mar roghnóir ar fhoireann Liam Sheedy a bhuaigh Craobh na hÉireann i 2010 agus cé nach raibh an oiread ratha air mar bhainisteoir, is fear é O’Shea a mbeadh tóir fós air.