Deineadh an tarraingt do Chraobhacha Peile Sinsear agus Idirmheánach na Gaillimhe anocht ar Raidió na Gaeltachta agus cúpla coimhlint suimiúil tagtha ‘as an bpota’.
Is cinnte gurb é an cluiche is mó a tharraingeoidh aird phobal na Gaeltachta ná an ceann idir na comharsana, an Cheathrú Rua agus Naomh Anna Leitir Mór. Dar ndóigh, is iad an Cheathrú Rua an t-aon fhoireann Gaeltachta riamh a bhuaigh Craobh Sinsear na Gaillimhe. 20 bliain ó shin, i 1996, a d’ardaigh siad Corn Mhic an tSionnaigh.
Imreoidh Mícheál Breathnach in aghaidh Chill Fhir Iarann, a bheidh d’uireasa Pádraic Joyce den chéad uair le fada an lá, casfaidh Bearna ar Naomh Mícheál agus tabharfaidh Maigh Cuilinn, seaimpíní chraobh idirmheánach na bliana seo caite, aghaidh ar Chill Chonla.
Tá Cora Finne, curaidh na bliana 2015, sa tóir ar a gceathrú craobh as a chéile agus cuirfidh siadsan tús lena bhfeachtas in aghaidh Carna/Caiseal.
Sa Chraobh Idirmheánach, beidh trí cinn d’fhoirne Gaeltachta, An Spidéal, Oileáin Árann agus Baile Chláir na Gaillimhe, san iomaíocht.
Bhí na hoileánaigh i mbaol a ndíbeartha ina gcéad bhliain ag an ngrád seo anuraidh ach thug siad na cosa leo agus beidh siad ag súil lena gcluiche in aghaidh Naomh Fheicín, an fhoireann eile a tháinig suas ón ngrád sóisear i 2014.
Imreoidh an Spidéal in aghaidh Mhuine Mheá/An Mhainistir sa chéad bhabhta chomh maith. Tá taithí mhaith ag na foirne seo ar a chéile agus casadh ar a chéile cúpla uair iad le cúpla bliain anuas. Imreoidh Baile Chláir na Gaillimhe in aghaidh Ghleann na Madadh sa chéad bhabhta chomh maith.
Babhta 1 Craobh Sinsear Peile na Gaillimhe 2016
Cill Chonla v Maigh Cuilinn
Eanach Dhúin v An Chealtrach
Cora Finne v Carna/Caiseal
Bóthar na Trá/Cnoc na Cathrach v Baile an Mhuilinn
Mícheál Breathnach v Cill Fhir Iarainn
An Cheathrú Rua v Naomh Anna, Leitir Mór
Bearna v Naomh Mícheál
Réalta Thuama v Seamróga Chartúin
Naomh Seosamh v Cathair Loistreáin
Cill Aithnín v An Creagán/Maigh Locha
Babhta 1 Craobh Idirmheánach Peile na Gaillimhe 2016
Baile Átha an Rí v Béal Átha na Sluaighe nó An Fhairche
Baile Chláir na Gaillimhe v Gleann na Madadh
Oileáin Árann v An Clochán
Dún Mhór Mhic Éil v Cora Finne
Mionlach v Baile Liam
Uachtar Ard v Naomh Breandán
An Spidéal v Muine Mheá/An Mhainistir
Áth Cinn v Cill Choirín/Cluain Bheirn
Fág freagra ar '‘Cath na gComharsana’ i gConamara agus an tarraingt déanta do Chraobhacha Peile na Gaillimhe'