Oíche na dTrí Ríthe
Ar lorg na dtrí ríthe
gabhaim tré Chorca Dhuibhne
gheal na gcoinnle
Oíche Nollaig na mBan-
Gleann na nGealt taibhseach,
Abhainn an Scáil lonrach,
an Daingean ciúin
ag fanacht le hiontaisí.
Ach ó Mhám an Lochaigh
síneann ríocht an tsolais
fé choróin bhán Bhréanainn
go Barra na hAille siar.
Fé mar a stad an réalt
os cionn an stábla
treoraíonn trí choinneal
ar bhonn fuinneoige mé
mar a bhfuil do dhá láimh sínte
ar nós fháilte an rí-linbh.
Bríd Ní Mhóráin
Fág freagra ar '‘Ar lorg na dtrí ríthe gabhaim trí Chorca Dhuibhne…’'