Tá an comhlacht foilsitheoireachta mórchlú Cois Life le scor ag deireadh na bliana seo chugainn.
Buille mór d’fhoilsitheoireacht na Gaeilge é scor an chomhlachta a tháinig ar an bhfód i 1995 agus ar thuill caighdeán a shaothar moladh go leor.
Dhíol Cois Life 104,800 leabhar ó bunaíodh é go dtí Meitheamh 2018, a dúradh inniu. 155 teideal, 74 údar nó eagarthóir, ar fad a foilsíodh agus tá 120 díobhsan fós i gcló. Tá 52 teideal de chuid an chomhlachta ar fáil mar ríomhleabhair agus13 teideal ar fáil mar chlosleabhair.
Dúirt stiúrthóirí an chomhlachta, Caoilfhionn Nic Pháidín agus Seán Ó Cearnaigh, gur oth leo an scéal go mbeidh an comhlacht á scor an bhliain seo chugainn ach go raibh siad “mórálach” as an méid a bhí bainte amach acu mar fhoilsitheoirí.
Bhí “áthas” orthu, a dúradh, go bhfuil sé i gceist ag Cló Iar-Chonnacht stoc agus cearta Chois Life a thógáil ar láimh. Déanfaidh Cló Iar-Chonnacht cúram de riar an stoic, iadsan a bheidh ag plé le ceadanna athfhoilsithe leabhar Chois Life agus “eisiúint athchlónna de réir chúinsí an mhargaidh”.
“Tá Cois Life mórálach as a bhfuil bainte amach go dtí seo chun an fhís bhunaidh a bhí againn a fhíorú: saothair liteartha agus taighde a chur ar fáil i nGaeilge. Táimid buíoch ó chroí dár gcomhpháirtithe uile san obair sin.
“Is ábhar misnigh agus sásaimh dúinn go nglacfaidh Cló Iar-Chonnacht cúram na dteideal foilsithe úd ar láimh. Tá lánmhuinín againn as a gcumas chun caidreamh fónta a chothú le húdair Cois Life agus táimid ag súil go bhfeicfear saothair spreagúla nua ag teacht ar aghaidh ón gcomhoibriú sin de réir a chéile.
“Mar chéim thosaigh ar an mbóthar sin tá sé i gceist go bhfoilseoidh Cló Iar-Chonnacht trí theideal a thionscain Cois Life nach mbeidh deis againn a fhoilsiú roimh dheireadh 2019,” a dúradh i ráiteas a d’eisigh Cois Life inniu.
Dúirt Caoilfhionn Nic Pháidín go mbraithfidh sí féin agus a comhstiúrthóir Seán Ó Cearnaigh uathu “an spreagadh agus an chruthaitheacht a bhaineann le hobair na foilsitheoireachta” agus go rabhadar ag súil beirt “le deiseanna scíthléitheoireachta sna blianta romhainn”.
Fág freagra ar 'An comhlacht foilsitheoireachta mórchlú Cois Life le dúnadh'