‘A Mhamaí, sin caint sheafóideach, níl Gaeilge ag superheroes!’

Breathnaigh ormsa, I am going an taobh seo,’ a bhéic sí anall orm agus í ag imeacht síos an sleamhnán droim ar ais agus cloigeann ar dtús. Beidh sí trí bliana d’aois an chéad lá eile agus tá sí ar a míle dícheall ag iarraidh Béarla a fhoghlaim. Tuigim di, ach, mar a dúirt an té a dúirt – it’s no wonder my cúl is liath. 

Níl mé cinnte cén uair go díreach a thosaigh sé. Ach am eicínt le deireanas, tá barúil agam gur fhág mé an domhan ceart is gur imigh mé isteach i ndomhan eile dátheangach.

Tá mé ar nós carachtair sa scannán Being John Malkovich. Ach, in áit a bheith tite isteach in intinn an aisteora John Malkovich, tá mé tite isteach in intinn na mban a thugann na torthaí amach go dátheangach ag comórtas amhránaíochta an Eurovision – L’Allemagne Douze Points.

‘Look at me,’ a deirim, ‘I am going this way.’ Ansin deirim, ‘Sin é an Béarla. Breathnaigh ormsa, tá mé ag gabháil an taobh seo. Sin í an Ghaeilge.’

Tá a fhios agam go gcaithfidh siad Béarla a fhoghlaim. Ach roimhe seo, ba é an plean a bhí againn ná go dtabharfadh muide aire don Ghaeilge sa mbaile is go dtabharfadh an saol mór aire don Bhéarla. Is í an Ghaeilge teanga an tí agus bhí sé d’aidhm againn é a fhágáil ag an gcuid eile den saol an Béarla a mhúineadh dóibh.

‘A Mhamaí, sin caint sheafóideach, níl Gaeilge ag superheroes!’ a dúirt beainín na naíonáin bheaga liom an lá cheana agus í do mo cheartú nuair a mheabhraigh mé dóibh Gaeilge a labhairt agus iad ag spraoi. Thar aon chluiche eile, is é an Béarla teanga chluiche na sárlaocha, feictear dom.

Thosaigh mé ag insint di faoi Ghráinne Mhaol ansin. Insint dhramatúil bunaithe ar m’aineolas – nach bhfuil teorainn leis – ar an scéal, agus ar an méid a sciob mé ó liricí Óró ‘Sé do Bheatha Abhaile. Ní hamháin gur duine de na sárlaocha le Gaeilge a bhí inti, a dúirt mé, ach ba chailín a bhí inti freisin agus mé ag iarraidh mo chuid a dhéanamh ar son chás na mban.

‘Sea, ach an raibh cape aici agus an raibh sí in ann eitilt?’ a d’fhiafraigh sí díom. B’shin an uair go gcaithfinn bréag bheag a insint. Ach, le bheith féaráilte, níl na tuairiscí ón aimsir sin róbheacht agus cá bhfios nach raibh Gráinne Mhaol in ann eitilt chomh maith le sárlaoch ar bith acu?