Tá Edel Ní Chorráin, as Fear Manach, ceaptha ina Leas-Phríomhfheidhmeannach ar Fhoras na Gaeilge agus ina Stiúrthóir Seirbhísí Oideachais leis an eagraíocht.
D’fhógair Príomhfheidhmeannach an Fhorais, Seán Ó Coinn, an ceapachán nua i ndiaidh cruinniú boird de chuid na heagraíochta a bhí ar siúl inniu.
“Ba mhaith liom a ceapachán a thréaslú le Edel agus tá mé féin agus an fhoireann ag súil go mór le bheith ag obair léi ina ról nua. Is post ríthábhachtach é an post seo, agus cé go mbeidh Edel lonnaithe in oifig Fhoras na Gaeilge i mBéal Feirste, beidh cúraimí an oideachais uirthi don tír ar fad le linn am atá cinniúnach i réimse an
oideachais i dtaca leis an Ghaeilge de.
“Beidh Edel ag tabhairt réimse scileanna agus taithí léi isteach sa phost ó na tréimhsí atá caite aici mar mhúinteoir agus mar riarthóir i réimse an oideachais,” a dúirt Ó Coinn.
Tosóidh Ní Chorráin ina ról nua in oifigí Bhéal Feirste Fhoras na Gaeilge i lár mhí Lúnasa na bliana seo.
Is as an nGarastún i gContae Fhear Manach ó dhúchas í Ní Chorráin. Bhain sí céim amach sa Ghaeilge agus sa Mhatamaitic in Ollscoil na hÉireann, Gaillimh. Tá teastas iarchéime san Oideachas aici ó Ollscoil na Ríona i mBéal Feirste chomh maith le M.Sc sna hIlmheáin Oideachais ón ollscoil chéanna.
Chaith sí tamall ag múineadh i gColáiste Feirste i mBéal Feirste agus i gColáiste Chineál Eoghain i gContae Dhún na nGall. Bhí sí tráth ina heagarthóir cúnta le Foras na Gaeilge agus ina bainisteoir oideachais don Ghaeloideachas leis an CCEA.
Fágadh folúntas i ról an Leas-Phríomfheidhmeannaigh ag deireadh na bliana seo caite nuair a ceapadh Seán Ó Coinn ina Phríomh-Fheidhmeannach ar an bhForas.
Fág freagra ar 'Edel Ní Chorráin ceaptha ina Leas-Phríomhfheidhmeannach ar Fhoras na Gaeilge'