Cuirfidh RTÉ 2fm tús le clár nua raidió i nGaeilge as seo go ceann cúpla seachtain, an chéad uair riamh ag an stáisiún popcheoil clár rialta i nGaeilge amháin a chraoladh.
Idir an dá linn, tuigtear do Tuairisc.ie go mbeidh an t-amhránaí mór le rá Ed Sheeran le cloisteáil ag seinm i nGaeilge ar albam nua atá le seoladh an tseachtain seo chugainn. Leagan Gaeilge de cheann dá amhrán féin a bheidh á chasadh ag an Síoránach.
I nGaeilge amháin a chuirfidh Bláthnaid Treacy clár na gcairteacha i láthair ar RTÉ 2fm gach Aoine. Mairfidh an clár ar feadh dhá huair an chloig.
Bíonn Bláthnaid Treacy ag obair le Spin FM agus RTÉ, mar a gcuireann sí Two Tube i láthair ar RTÉ2. Tá sí ag fágáil Spin FM chun díriú ar a cuid oibre le RTÉ, idir obair teilifíse agus an clár Gaeilge nua ar 2fm.
Dúirt Grúpcheannasaí Gaeilge RTÉ, Rónán Mac Con Iomaire le Tuairisc.ie gur léiriú a bhí sa chlár nua Gaeilge “ar thiomantas na seirbhíse i leith phlean gníomhaíochta Gaeilge RTÉ”.
“Is forbairt iontach dearfach é go bhfuil RTÉ 2fm ag tabhairt faoi chlár dá leitheid seo, agus is teachtaireacht ar leith atá ann ó thaobh na Gaeilge de i bhfianaise an spriocmhargaidh óig agus na feidhme tráchtála a bhaineann le RTÉ 2fm,” a deir Mac Con Iomaire.
Dúirt sé nach raibh sa chlár nua ach gné amháin “de shraith gníomhartha atá ar bun ag RTÉ 2fm i leith na Gaeilge”.
Luaigh sé chomh maith an t-albam atá curtha le chéile ag 2fm i gcomhar le Conradh na Gaeilge. Ar an albam sin, tá bannaí ceoil aitheanta le cloisteáil ag casadh leaganacha Gaeilge dá gcuid amhrán. Tá sé i gceist na hamhráin Ghaeilge a chur ar sheinnliosta oifigiúil na seirbhíse.
Chas an craoltóir Eoghan McDermott amhrán ón albam nua den chéad uair an tseachtain seo caite – leagan Gaeilge ag Kodaline dá n-amhrán, ‘Love Will Set You Free’.
Tá an t-albam féin á sheoladh an tseachtain seo chugainn, albam ar a mbeidh Ed Sheeran agus ceoltóirí aitheanta Éireannacha le cloisteáil ag amhrán i nGaeilge.
Ní hé seo an chéad uair a chuir Sheeran suim sa teanga. Bhí scéalta go leor sna meáin anuraidh faoin tatú i nGaeilge a fuair sé.
Gearóid
Is tearc na daoine a bhfuil níos mó de thionchar acu ar aos óg na tíre seo ná an Síoránach. Bua ollmhór é seo!