Teideal an Phoist: Ollamh Comhlach leis an bhFiontraíocht agus an Nuálaíocht
Dáta Deiridh: 30 Deireadh Fómhair 2026 ag 12 meán lae
Achoimre ar an bPost:
Is scoil ghnó nuálach í Scoil Ghnó Choláiste na Tríonóide (TBS) a bhfuil ard-rangú idirnáisiúnta aici agus atá mar chuid de Choláiste na Tríonóide, Baile Átha Cliath, an ollscoil is sine in Éirinn agus an ollscoil is airde rangaithe sa tír. Tá Creidiúnú Triarach ag an Scoil ó AACSB, AMBA agus EQUIS, chomh maith le Gradam Cré-umha Athena SWAN mar aitheantas ar a cuid éachtaí i dtaobh cothromaíocht inscne a chur chun cinn. Tá an Scoil Ghnó lonnaithe i bhfoirgneamh comhaimseartha atá neamhdhíobhálach don chomhshaol ar champas Choláiste na Tríonóide, gar do mhórionaid ghnó idirnáisiúnta, go háirithe sna hearnálacha airgeadais, comhairliúcháin straitéisigh agus gnó digiteach.
Tá Scoil Ghnó Choláiste na Tríonóide ag cur a straitéise Transforming Business for Good i bhfeidhm, agus béim inti ar an inbhuanaitheacht, ar an gclaochlú tríd an nuálaíocht agus ar an ionchuimsiú sóisialta.
Tá an Scoil ag lorg iarratas ar cheapachán straitéiseach ag leibhéal an Ollaimh Chomhlaigh leis an bhFiontraíocht agus leis an Nuálaíocht, agus béim ar leith ar an Intleacht Shaorga, ar an bhFiontraíocht Dhigiteach agus ar Bhainistiú na Nuálaíochta.
Cuirfear fáilte ar leith roimh iarratais ó scoláirí is cleachtóirí gníomhacha a nascann diantaighde ar ardchaighdeán le taithí dhíreach ar fhiontair a chruthú, ar chleachtas na nuálaíochta nó ar éiceachórais fiontraíochta a fhorbairt.
Tá an ceapachán seo mar chuid d’uaillmhian straitéiseach Scoil Ghnó Choláiste na Tríonóide í féin a bhunú mar phríomhscoil ghnó na hÉireann i réimsí na fiontraíochta, na nuálaíochta agus an chlaochlaithe dhigitigh fhreagraigh. Beidh ról lárnach ag an iarrthóir a n-éireoidh leis maidir le teagasc, taighde agus rannpháirtíocht sheachtrach na Scoile i réimse na fiontraíochta a chur chun cinn, agus cuirfidh sé freisin le forbairt Mhol Fiontraíochta Mac Léinn Choláiste na Tríonóide.
Táimid ag lorg scoláire a bhfuil aitheantas idirnáisiúnta aige agus a gcuireann a chuid taighde le heolas agus tuiscint ar fhiontraíocht dhigiteach, ar shamhlacha gnó atá bunaithe ar ardáin, ar chruthú fiontar le tacaíocht na hintleachta saorga, ar chlaochlú digiteach nó ar éiceachórais fiontraíochta. Beidh cuntas sármhaith ar thaighde ardchaighdeáin ag an iarrthóir a n-éireoidh leis, mar aon le fianaise go mbíonn tionchar ag a chuid oibre ar chleachtas fiontraíochta, ar bheartas nó ar chinnteoireacht feidhmiúcháin.
Cuirfidh an t-iarrthóir a n-éireoidh leis le soláthar teagaisc ar chláir fochéime, iarchéime agus oideachais feidhmiúcháin, go háirithe an MSc san Fhiontraíocht agus sa Nuálaíocht, cláir MBA, cláir Oideachais Feidhmiúcháin agus modúil fochéime san fhiontraíocht agus sa nuálaíocht.
Cuirfidh sé freisin le forbairt leanúnach cleachtas teagaisc a bhfuil an intleacht shaorga mar thaca leo, oideachas fiontraíochta ó thaithí, foghlaim bunaithe ar fhiontair agus timpeallachtaí foghlama digiteacha.
Stádas an Phoist: Conradh Buan
Tuilleadh eolais ar fáil ANSEO
