Tada le rá ag an Pentagon faoi fhíseán de Ghaeilgeoir in arm Mheiriceá ag casadh ‘Go on home, British soldiers’

Tá diúltaithe ag an Pentagon aon rud a rá faoi fhíseán conspóideach ina bhfuil saighdiúir Gael-Mheiriceánach le feiceáil san Afganastáin agus é ag casadh ‘Go on home, British soldiers’, amhrán poblachtánach ar cumadh le linn na dTrioblóidí é.

Tuigtear do Tuairisc.ie gur Séamus Ó Fianghusa is ainm don té atá le feiceáil san fhíseán. Tugtar ‘Séamus na Gaeilge’ ar Ó Fianghusa, fear as Brooklyn i Nua Eabhrac, a thosaigh ag foghlaim na Gaeilge deich mbliana ó shin ar an idirlíon agus a bhfuil tréimhsí caite aige i nGaeltacht Dhún na nGall.

D’fhreastail Ó Fianghusa ar chúrsa Oideas Gael i nGleann Cholm Cille agus ghlac sé páirt chomh maith i gcomórtas Oireachtais.

De réir tuairisce ar shuíomh idirlín Forces TV, dhiúltaigh an Pentagon ráiteas a dhéanamh faoin bhfíseán a foilsíodh ar an leathanach Facebook  ‘U.S Army W.T.F! Moments’ a chuireann amach ábhar grinn a bhaineann le harm Stáit Aontaithe Mheiriceá.

Dúirt urlabhraí ó ‘U.S Army W.T.F! Moments’ gur duine anaithnid a chuir an físeán ar fáil dóibh agus gur baineadh dá leathanach Facebook é nuair a cuireadh ar a súile dóibh go léiríonn liricí an amhráin tacaíocht don IRA Sealadach.

San fhíseán tá Ó Fianghusa le feiceáil ag casadh ‘Go on home British Soldiers Go on home/Have you got no fucking homes of your own/For 800 years we’ve fought you without fear/And we will fight you for 800 more’.

Tugann a chomrádaithe san arm bualadh bos dó nuair atá an t-amhrán ráite aige.